வெருளி நோய்கள் 906-910: இலக்குவனார் திருவள்ளுவன்

 ஃஃஃ    இலக்குவனார் திருவள்ளுவன்      01 January 2026      அகரமுதல

(வெருளி நோய்கள் 901-905: தொடர்ச்சி)

வெருளி நோய்கள் 906-910

906. கேர்மிட்டு வெருளி – Kermitphobia

புனைவுருவான கேர்மிட்டு தவளை தொடர்பான அளவுகடந்த பேரச்சம் கேர்மிட்டு வெருளி.
கேர்மிட்டின் பகுத்தறிவு, விரைவு, துணிச்சல் செயற்பாடு பலரையும் கவர்ந்தாலும் அதே விரைவும் துணிச்சலுமான செயற்பாடுகளே பலருக்கு வெருளி விளைவிப்பதாக உள்ள்து.
தவளை வெருளி(Ranidaphobia), போன்மை வெருளி (Automatonophobia) உள்ளவர்களுக்குக் கேர்மிட்டு வெருளி வரும வாய்ப்பு உள்ளது.
00

907. கேலிப் பாத்திர வெருளி – Kyrofelonoshophobia

கேலிச்சித்திரப் பாத்திரம் தொடர்பான அளவுகடந்த பேரச்சம் கேலிப் பாத்திர வெருளி.
கேலிப்படங்களில் இடம் பெறும் தனித்துவத் தோற்றம் காரணமாகச் சிறுவர்களுக்கு அச்சம் வருகிறது. வஞ்சன்(வில்லன்) பாத்திரத்தால் பாதிக்கப்படுவதைப் பார்க்கும் சிறுவர்கள் கெட்டகனவுகளுக்கும் உள்ளாகிறார்கள். இதனால் ஏற்படும் பாதிப்பும் வெருளியை உண்டாக்குகிறது. இவை கதைப்பாத்திரங்களே நேரில் வரா எனச் சிறுவர்களுக்கு அறிவுறுத்தி இவ்வச்சத்தைப் போக்க வேண்டும்.
பெரியவர்களுக்கும் கேலிப் பாத்திர வெருளி வரும வாய்ப்பு உள்ளது. சிறுவர்கள் வளர வளர சிறு அகவையில் ஏற்பட்ட வெருளியும் வளரும் வாய்ப்பு உள்ளது.
00

908. கேள்விக்குள்ளாதல் வெருளி – Questiophobia

கேள்விக்குள்ளாதல் தொடர்பான அளவுகடந்த பேரச்சம் கேள்விக்குள்ளாதல் வெருளி.
மாணாக்கர்களிடம் ஆசிரியர்கள் வினா தொடுப்பது குறித்த அச்சம் வேறு வகை. அமைப்பின் பொறுப்பாளர்கள், அரசியல் வாதிகள், பிறரால் அல்லது கட்சியினரால் தம் செயல்பாடுகள் குறித்துக் கேள்வி கேட்பர் என்ற எதிர்பார்ப்பு அல்லது கேள்வி கேட்கப்படுதல் போன்ற சூழலில் ஏற்படும் பேரச்சம் இது.
00

909. கை உலர்த்தி வெருளி – Manussiccusphobia

கை உலர்த்தி(hand dryer) குறித்த வரம்பற்ற பேரச்சம் கை உலர்த்தி வெருளி.
கை உலர்த்தி இயங்கும் பொழுது ஏற்படும் ஒலியைக் கேட்டுச் சிலர் அஞ்சுகின்றனர். அதிலிருந்து வரும் வெப்பக்காற்றால் கைகள் தீய்ந்து விடும் அல்லது கைகளுக்குத் துன்பம் நேரும் எனச் சிலர் அஞ்சுகின்றனர். இவற்றால் கை உலர்த்தி வெருளிக்கு ஆளாகின்றனர்.
கையை உலரவிடுதல் என்னும் பொருள் கொண்ட Manussiccus என்னும் இலத்தீன் தொடரிலிருந்து உருவானது. கையை உலரவிடும் கருவி கை உலர்த்தி என்றாயிற்று.
00

910. கை விலங்கு வெருளி – Handcuffphobia

கை விலங்கு குறித்த வரம்பற்ற பேரச்சம் கை விலங்கு வெருளி.
முன்னரே தளையிடப்பட்டவர்கள், குற்றவாளிகள், ஏதேனும் சூழலில் குற்றச்சாட்டிற்கு ஆளான அப்பாவிகள் ஆகியோருக்குச் சிறையிடப்படுவோம் என்ற அச்சத்தால் கைவிலங்கு வெருளி வருகிறது.

பிணைப்பு வெருளி (Merinthophobia) உள்ளவர்களுக்குக் கைவிலங்கு வெ்ருளி வரும் வாய்ப்பு உள்ள்து.
00

(தொடரும்)
இலக்குவனார் திருவள்ளுவன்
வெருளி அறிவியல் 2/5

வெருளி நோய்கள் 901-905: இலக்குவனார் திருவள்ளுவன்

ஃஃஃ    இலக்குவனார் திருவள்ளுவன்      31 December 2025      அகரமுதல

(வெருளி நோய்கள் 896-900: தொடர்ச்சி)

வெருளி நோய்கள் 901-905

901. கெடுமதிப்பு வெருளி  – Oppugnophobia(2)

சுட்டுரை, முகநூல் முதலான குமுகத் தளங்களில் பின் தொடருநர் இழிவாக எண்ணும் வகையில் சிலர் மதிப்புக்கேடாகக் குறிப்பிடுவார்கள் எனப் பேரச்சம் கொள்ளுதல் கெடுமதிப்பு வெருளி.

00

902. கெண்டக்கி கோழி வெருளி -KFCphobia

கெண்டக்கி கோழி உணா குறித்த வரம்பற்ற பேரச்சம் கெண்டக்கி கோழி  வெருளி

கெண்டக்கி வறுகோழி (KFC, Kentucky Fried Chicken) என்பது விரைவு உணவுச்சாலைகளின் கூட்டமைப்பு. இதன் தலைமையிடம் கெண்டக்கியில் உள்ள (உ)லூயிவிலில் (Louisville ) உள்ளது.

வறு கோழியுடன் பிற உணவுகளும் விற்பதால் கெண்டகி வறுகோழி வெருளி என்று சொல்லாமல் கெண்டகி கோழி எனக் குறிக்கப்பெறுகிறது.

00

903. கெண்டக்கி வெருளி -Kentuckyphobia

கெண்டக்கி மாநிலம் குறித்த வரம்பற்ற பேரச்சம் கெண்டக்கி வெருளி.

கெண்டக்கி(Kentucky) ஐக்கிய அமெரிக்க மாநிலங்களில் 15 ஆவது மாநிலமாக 1792 இல் இணைந்தது. இதன் தலைநகரம் ஃபிராங்போர்ட்டு(Frankfort).

கெண்டக்கி மாநிலம் தொடர்பானவற்றுள், உணவு, பழக்க வழக்கம், பண்பாடு, தொழில், மக்கள் என ஒன்று அல்லது அதற்கு மேற்பட்ட பொருண்மைகளில் ஏற்படும் அளவுகடந்த பேரச்சம்.

00

904. கேட்பி வெருளி  – Hearingaidphobia

கேட்புதவிப்பொறி(Hearingaid)  குறித்த வரம்பற்ற பேரச்சம் கேட்பி வெருளி.

செவிப்புலன் குறைந்தோர் கேட்பதற்குப் பயன்படும் கருவி காதொலிக்கருவி அல்லது செவித்துணைக் கருவி அல்லது கேட்புதவிப்பொறி என அழைக்கப்படுகிறது. இதனைச் சுருக்கமாகக் கேட்பி எனக் குறிக்கலாம்.

கேட்பியை அணிவதால் தம்மைச் செவிடர் எனப் பிறர் எண்ணுவர் என்ற அச்சம், தரமற்றவற்றை அணிந்து சரியாகக் கேட்க முடியாமல் போவதால் ஏற்படும் இடர் போன்ற கவலையும பேரச்சமும் கொள்வதால் கேட்பி வெருளி வருகிறது.

00

905. கேயானு வெருளி – Keanuphobia

கேயானு கதைப்பாத்திரம் குறித்த வரம்பற்ற பேரச்சம் கேயானு வெருளி.

கேயானு இரீவசு என்னும் கனடா நடிகர் உள்ளார். இங்கே அவரைக் குறிக்கவில்லை. தீன் கோண்டசு (Dean Koontz) என்பவரின் பொய்யான நினைவகம் (False Memory) என்னும் புத்தகத்தில் உள்ள பாத்திரம் ஒன்றின் பெயர். அதில் கேயானு மீது ஒரு பெண்ணிற்கு அளவுகடந்த வெறுப்பும் அச்சமும் இருப்பதாக வரும். அதனையே கேயானு வெருளி என்கின்றனர்.

00

(தொடரும்)
இலக்குவனார் திருவள்ளுவன்
வெருளி அறிவியல் 2/5

வெருளி நோய்கள் 896-900: இலக்குவனார் திருவள்ளுவன்

 ஃஃஃ     இலக்குவனார் திருவள்ளுவன்      30 December 2025      அகரமுதல

(வெருளி நோய்கள் 891-895: தொடர்ச்சி)

வெருளி நோய்கள் 896-900

896. கூன் வெருளி – Kyphophobia

குனிவு, வளைவு, கூன் முதலானவை பற்றிய இயல்பு கடந்த பேரச்சம் கூன் வெருளி.
குனிவு வெருளி என முன்பு குறித்திருந்தேன். இப்பொழுது கூன் வெருளி என மாற்றியுள்ளேன்.
இராமாயணத்தில் இராமனைக் காட்டிற்கு அனுப்பக் காரணமாக இருந்த மந்தரை என்னும் பெண்மணி கூனியாக இருந்தமையால், கூனி என்றாலே சூழ்ச்சிக்காரர் என்ற நம்பிக்கை பலரிடம் உள்ளது.
துன்ன_அரும் கொடு மன கூனி தோன்றினாள் (இராமாயணம்,அயோத்தியா காண்டம்,2.46/4)
சூழ்ந்த தீ வினை நிகர் கூனி சொல்லுவாள்(இராமாயணம்,அயோத்தியா காண்டம், 2.55/2)
என மந்தரையாகிய கூனியைக் கொடுமன கூனி என்றும் தீவினை கூனி என்றும் கம்பர் கூறுகின்றார். இதனால் கூன் முதுகு உடைய முதியோர் மீது பரிவு வராமல் அச்சம் கொள்பவர்கள் உள்ளனர்.
அரசியல்வாதிகள் தங்கள் தலைவர்களுக்கு முன்னால் குனிந்து கூனிட்டு வளைந்து அடிபணிவது பார்க்கும் பொழுது பிறருக்கு வெறுப்பு வருகிறது. இந்த உணர்வு வளர்ந்தால் அது கூன்வெருளியாகும்.
திரைப்படங்களில் கூன் முதுகு உடையோரைக் கேலியாக / நகைச்சுவையாகக் காண்பிப்பதும் தவறு. தங்கமலை இரகசியம், அடிமைப்பெண், பேரழகன் முதலான சில படங்களில் பகுதிக்காட்சிகளில் கூன் வேடமிட்டு நாயகர்கள் நடித்தாலும் கேலிவேடத்தில் நடிக்கவில்லை. எனினும் சில திரைப்படங்களில் ‘கேடு செய்யும் கூனிக்கிழவி’ என்று பாத்திரப்படைப்புகள் உள்ளமையால் கூன் அச்சம் இதைப் பார்ப்பவர்க்கு வருவது இயற்கையே.
kypho என்னும் கிரேக்கச் சொல்லின் பொருள்கள் கூன்/குனிவு/வளைவு.
00

897. கூரறிவு வெருளி – Keyaiphobia
     கூரறிவு தொடர்பான அளவற்ற பேரச்சம் கூரறிவு வெருளி.
     keyai என்பது கூர்த்த மதியைக் குறிக்கும் யாவானர்(Jawa) மொழிச்சொல்.
     00
898. கூரைச் சாளர வெருளி – Trgmophobia

மேல் தளச் சாளரம் தொடர்பான அளவுகடந்த பேரச்சம் கூரைச் சாளர வெருளி.
கூரைவழியாகச் சூரிய ஒளி முதலான வான் வெளி ஒளி கட்டடத்திற்குள் வரும் வகையில் அமைக்கப்படும் கட்டடங்களில் வான் ஒளியால் வரும் பேரச்சமே இவ் வெருளியாகும். அதனால் கூரை ஒளி வெருளி என்றும் சொல்லலாம்.
Trgmo என்றால் மேல்தளச் சாரளரம் கூரைச் சாளரம் கூரைத் திறப்பு எனப் பொருள்கள்.
00

899. கூள அஞ்சல் வெருளி – Quisquiliaphobia

குப்பைக்கூளமான அஞ்சல்கள் குறித்த அளவுகடந்த பேரச்சம் கூள அஞ்சல் வெருளி.
நமக்குத் தேவையும் தொடர்புமற்ற அஞ்சல்கள் அவ்வப்பொழுது வந்து தொந்தரவு செய்கின்றன. மின்னஞ்சல் வந்தபின்னர் நாளும் மின்னஞ்சல் வழியாக இத்தகைய செய்திகள் அல்லது மடல்கள் வருகின்றன.
உங்களுக்கு இத்தனை கோடிப் பணம் அல்லது இவ்வளவு பெரிய தொகை கிடைக்க உள்ளது, உங்களுக்கு முதல் பரிசு வந்துள்ளது, எனக்குப் பின் யாரும் உறவினர் இன்மையால், நான் நல்லவர் என அறிந்து கொண்ட உங்களுக்கு என் சொத்து முழுவதையும் எழுதிவைக்கப் போகிறேன், உங்கள் பெயரில் நாங்கள் வங்கிக் கணக்கு தொடங்கியுள்ளோம், உங்களுக்கு வட்டியில்லாக் கடன் ஒப்பளிப்பு செய்துள்ளோம், உங்கள் தகுதிக்கேற்ற வேலை வழங்குகிறோம் என்பனபோன்ற எண்ணற்ற மின்னஞ்சல்கள் வருகின்றன. குப்பைக் கூளத்தில் சேர்க்க வேண்டிய இவற்றைப் பொருட்படுத்தி அளவுகடந்த பேரச்சத்திற்கு ஆளாகின்றனர்.

quisquiliae என்னும் இலத்தீன் சொல்லிற்குத் தகுதியற்ற/ கவைக்குதவாத/குப்பைக் கூளம் எனப் பொருள்கள்.
காண்க: மின்னஞ்சல் வெருளி(aperepiphobia)
00

900. கெடுதி வெருளி – Pamperphobia

நம் செயல்களால் பிறர் கேடுறுவது தொடர்பான அளவுகடந்த பேரச்சம் கெடுதி வெருளி.
குழந்தைகளுக்குச் செல்லம் கொடுப்பதால் கேடுறுதல் போன்று கேடுறும் வாய்ப்புகள் குறித்த பேரச்சம் இதற்குக் காரணமாகின்றது.
Pamper என்னும் கிரேக்கச் சொல்லிற்கு இடங்கொடுத்துக் கெடுத்தல் எனப் பொருள்.
00

(தொடரும்)
இலக்குவனார் திருவள்ளுவன்
வெருளி அறிவியல் 2/5

வெருளி நோய்கள் 891-895: இலக்குவனார் திருவள்ளுவன்

ஃஃஃ     இலக்குவனார் திருவள்ளுவன்      29 December 2025      அகரமுதல

(வெருளி நோய்கள் 886-890: தொடர்ச்சி)

வெருளி நோய்கள் 891-895

891. கூட்டாண்மை வெருளி -Lwuntophobia

கூட்டாட்சி, கூட்டுரிமைக் குடியிருப்பு, கூட்டாண்மை(condominium) தொடர்பான அளவுகடந்த பேரச்சம் கூட்டாண்மை வெருளி.
00

892. கூபிவெருளி – Scoobyphobia

புனைவுரு இசுகூபி -டூ (Scooby Doo) குறித்த வரம்பற்ற பேரச்சம் கூபிவெருளி.
(இசு)கூபி-டூ (Scooby-Doo) என்பது அமெரிக்க இயங்குபடத் தொடராகும்.
00

893. கூம்பு தித்தி வெருளி – Candycornphobia

கூம்பு தித்தி குறித்த வரம்பற்ற பேரச்சம் கூம்பு தித்தி வெருளி
1880 இல் இஃது முதலில் உற்பத்தியான பொழுது இதன் பெயர் கோழித்தீனி(Chicken Feed) என்பதுதான். கற்கண்டு நிறுவனம் (Wunderlee Candy Company) ஒன்று இதனை உற்பத்தி செய்தபொழுது அந்நிறுவனப் பெயரையும் இதன் வடிவத்தையும் இணைத்து candy corn என்றனர்.
00

894. கூர் குத்து வெருளி – Pungophobia

கூர் குத்து தொடர்பான அளவுகடந்த பேரச்சம் கூர் குத்து வெருளி.
pungo என்னும் இலத்தீன் சொல்லின் பொருள் குத்து.
கத்தி போன்ற கூரிய பொருளால் குத்தப்படுவோம் எனக் காரணமற்று அல்லது அளவுகடந்து அச்சம் கொள்வது. கூரிய கரிக்கோல்(பென்சில்)போன்றவற்றையும் பயன்படுத்த அஞ்சுவர்.
00

895. கூர் வெருளி-Aichmophobia

கூர்மையான முனையுடைய எப்பொருள் பார்ததாலும் ஏற்படும் அளவுகடந்த பேரச்சம் கூர் வெருளி.
கத்தி முனை, எழுதி(pen) முனை, அறைகலன்களின் முனை, கட்டுமானப் பொருள்களின் முனை, எப்பகுதியாய் இருந்தாலும் அதன் நீட்சி, அம்புபோல் மடிக்கப்பட்டகூர்மையான தாள் எனக் கூர்முனையாகத் தோற்றமளிக்கும் எல்லாமும் அல்லது இவற்றில் ஒன்று அல்லது ஒன்றுக்கு மேற்பட்ட கூரிய பொருள்களின் மீது இத்தகையோருக்குப் பேரச்சம் வரும்.
சிலர், மருந்தூசி வெருளியையும்(Trypanophobia) கூர் வெருளி என்கின்றனர். அதுவும் கூர் வெருளி போன்றதுதான். எனினும் அதனைத் தனியாகவே குறிப்பிடலாம்.
நுனை வெருளி(Belonephobia), அயில் வெருளி(Enetophobia) ஆகியவற்றுடன் ஒப்புமை உடையது.
aichmē என்னும் கிரேக்கச் சொல்லுக்குப் பொருள் முனை.
00

(தொடரும்)
இலக்குவனார் திருவள்ளுவன்
வெருளி அறிவியல் 2/5

வெருளி நோய்கள் 886-890: இலக்குவனார் திருவள்ளுவன்

ஃஃஃஃ   இலக்குவனார் திருவள்ளுவன்      28 December 2025      அகரமுதல

(வெருளி நோய்கள் 881-885: தொடர்ச்சி)

வெருளி நோய்கள் 886-890

886. கூட்ட வெருளி-Ochlophobia/Enochlophobia

கூட்டத்தைக் கண்டு ஏற்படும் இயல்பு மீறிய பேரச்சம் கூட்ட வெருளி.
பொதுவிட வெருளி(agoraphobia) உடன் தொடர்பு உடையது.
கூட்டம் என்பது சந்திப்பு என்பதையும் குறிக்கும். இங்கே திரளாகக் கூடுவதைக் குறிக்கிறது. திரளான கூட்டத்தைப்பார்ததால் அஞ்சுவோர் உள்ளனர்.
கூட்டத்தில் பொருள்கள் தொலைந்து போகலாம், உடைமைகள் திருடு போகலாம், துன்புறுத்தல் நிகழலாம், தொற்றுநோய்க்கு ஆளாகலாம் என்பன போன்ற அச்சங்களாலும் கூட்டம் கண்டு அஞ்சுவோர் உள்ளனர்.
‘சொர்க்கம்’ திரைப்படத்தில் கண்ணதாசனின் சொல்லாதே யாரும் கேட்டால் எனத் தொடங்கும் பாடலில்,
உரிமையோ உரிமை என்று ஊரெங்கும் மேடை போட்டால்
கடமையோ கடமை என்று காரியம் செய்தால் என்ன..
காரியம் செய்தால் என்ன…?
என்று பாடல் வரிகள் வரும். இதுபோல் மேடைப்பேச்சு வீண் என்று அதை வெறுப்பவர்களும் உள்ளனர்.
கட்டணம் செலுத்திப் பேச்சைக் கேட்கும் மக்களும் உள்ளனர். பேச்சாளர்களைப் பொருத்தது இது. எனினும் பொதுக்கூட்டங்களால் போக்குவரத்து இடையூறு, காலநேரம் தள்ளிப்போதல், வழக்கமான வேலை பாதிப்பு போன்ற இடையூறுகளை எண்ணி அஞ்சுவோரும் உள்ளனர்.
இப்பொழுது கூட்டங்களில் பணம், உணவு, மது அல்லது வேறு பொருள் கொடுத்து ஆள் சேர்க்கின்றனர். இவர்களுக்குக் காலம் கடக்கும் கூட்டங்கள் எரிச்சலையே ஏற்படுத்துகின்றன.
கும்பல் வெருளி() உள்ளவர்களுக்குக் கூட்ட வெருளி வரும் வாய்ப்பு உள்ளது.
ochlo என்னும் கிரக்கச் சொல்லின் பொருள் கூட்டம்
00

887. கூஃபி வெருளி – Goofyphobia

புனைவுரு பாத்திரமான கூஃபி தொடர்பான அளவுகடந்த பேரச்சம் கூஃபி வெருளி.
00

888. கூடுகை வெருளி – Congressiophobia

அமைப்புகளின் செயற்குழு, பொதுக்குழு முதலான கூட்டங்களில் பங்கேற்றல் குறித்து ஏற்படும் அளவுகடந்த பேரச்சம் கூடுகை வெருளி.
அமைப்புகளின் பொறுப்புகளில் உள்ளவர்களுக்குப் பணிகள், கணக்கு விவரங்கள், நிறைவேற்றாத திட்டங்கள் முதலானவைபற்றிப் பிறர் கேட்டால் எப்படிச் சமாளிப்பது என்று பெருங்கவலையும் பேரச்சமும் வருவதுண்டு. பொறுப்புகளில் இல்லாதவர்களுக்கும் அமைப்பு தொடர்பான கருத்து எதையும் கேட்டால் எப்படி விடையிறப்பது என்ற காணரமற்ற பேரச்சம் எழுவதுண்டு.
congress என்னும் கிரேக்கச் சொல்லிற்குச் சந்திப்பு எனப் பொருள். இங்கே அமைப்பு முறையிலான ஒன்று கூடுதலைக் குறிக்கிறது.

00

889. கூடை வெருளி – Kalathiphobia

கூடை குறித்த வரம்பற்ற பேரச்சம் கூடை வெருளி.
கூ்டையைப் பார்த்தாலோ நினைத்தாலோ சிலருக்குக் காரணமற்ற பேரச்சம் வருகிறது.
கூடை என்னும் பொருள் கொண்ட kalathos என்னும் கிரேக்கச் சொல்லிலிருந்து வந்தது.
.00

890. கூடைப்பந்தாட்ட வெருளி – Basketballphobia

கூடைப்பந்தாட்டம் குறித்த வரம்பற்ற பேரச்சம் கூடைப்பந்தாட்ட வெருளி.
கூடைப்பந்தாட்டத்தால் காயம் ஏற்படும், தோல்வி வரும் என்பது குறித்த பதற்றம் போன்றவ்றறால் கூடைப்பந்தாட்டம் குறித்து வெருளி கொள்வர்.
பொதுவாக விளையாட்டு குறித்துப் பேரச்சம் கொள்வோருக்குக் கூடைப்பந்தாட்ட வெருளி வரும் வாய்ப்பு உள்ளது.
00

(தொடரும்)
இலக்குவனார் திருவள்ளுவன்
வெருளி அறிவியல் 2/5

வெருளி நோய்கள் 881-885: இலக்குவனார் திருவள்ளுவன்

 ஃஃஃ     இலக்குவனார் திருவள்ளுவன்      27 December 2025      அகரமுதல

(வெருளி நோய்கள் 876-880: தொடர்ச்சி)

வெருளி நோய்கள் 881-885

881. குறை வுணா வெருளி – Junkcibophobia

குறை வுணா (junk food) மீதான மிகையான பேரச்சம் குறை வுணா வெருளி.
குறை வுணா என்றால் குறைந்த அளவு உணவு என்று கருதாமல் குறைந்த அளவு ஊட்டமுள்ள சிற்றுணா எனக் கொள்ள வேண்டும்.
junk, cibus ஆகிய கிரேக்கச் சொற்களுக்கு முறையே சிறுமை, உணவு எனப் பொருள்.
00

882. குறை தாள் வெருளி –Atelodemiourgiopapyrophobia

தாளில் எழுதத் தொடங்கி அல்லது வரையத் தொடங்கி முற்றுப்பெறாமல் அரைகுறையாக விடப்படும் குறைபடைப்புத் தாள் குறித்த அளவு கடந்த பேரச்சம் குறை தாள் வெருளி.
தாள் வெருளியிலும் வெற்றுத்தாள் வெருளியிலும் இஃது அடங்கும்.
00

883. குறைத் துடிப்பு வெருளி – Bradycardiaphobia

இதயத் துடிப்பு எண்ணிக்கை குறைவதால் இறப்பு நேரிடும் என்று அளவுகடந்து பேரச்சம் கொள்வது குறைத் துடிப்பு வெருளி
ஒரு நிமையத்திற்கு நெஞ்சு 72 முறை துடிப்பதே இயல்பான நிலையாகும். இருப்பினும் அகவை வேறுபாட்டு அடிப்படையிலும் ஆண், பெண் வேறுபாட்டு அடிப்படையிலும் மாறுபடலாம். இது 100க்கும் கூடுதலாக இருக்குமாயின் அதை மிகைத் துடிப்பு நோய் எனவும் 60க்கும் குறைந்தால் குறைத் துடிப்பு நோய் (bradycardia) என்றும் கூறுவர். குறைத்துடிப்பு குறிதத வெருளியே இது.
பழங்கிரேக்கத்தில் Brady (bradணs) என்றால் மெதுவான என்றும் cardia (kardஅa/καρδία) என்றால் நெஞ்சு/இதயம் என்றும் பொருள்கள்.
00

884. குறைபார்வை வெருளி –Scotomaphobia

பார்வைக் குறைபாடு குறித்த அளவுகடந்த பேரச்சம் குறைபார்வை வெருளி.
பார்வையில் குறை நேரும் பொழுது ஏற்படும் அளவு கடந்த பேரச்சம், நிலையாகக் குருடாகி விடுவோம் என்ற அச்சம், பார்வையின்மை ஏற்பட்டுப் பெருந்துன்பம் நேரும் என்ற பேரச்சம் எனப்பார்வை குறைபாடு வந்தால் நீக்குவது குறித்துக் கருத்து செலுத்துவதை விட அதன்தீமை குறித்தே அஞ்சிக் கொண்டிருப்பது போன்றவை.
குருட்டு வெருளி என்பதையும் முதலில் குறிப்பிட்டிருந்தேன். அவ்வாறு நேரடியாகச் சொல்வதைத் தவிர்ப்பதற்காக இப்பொழுது அதை நீக்கி விட்டேன்.
scotoma என்னும் கிரேக்கச் சொல்லின் பொருள் பார்வையின்மை.
00

885. கூச்ச வெருளி – Gargalaphobia

கூச்சம்பற்றிய காரணமற்ற அளவு கடந்த பேரச்சம் கூச்ச வெருளி.
இறகு வெருளி(Pteronophobia) உடன் ஒப்புமையுடையது என்றாலும் வேறுபட்டது. இறகு வெருளி என்பது மயிலிறகு போன்ற இறகால் வருடிக் கூச்சம் ஊட்டுவதைக் குறிக்கும். எப்பொருளால் தொட்டாலும் கை கால்களால் தீண்டினாலும் பூச்சிகள் ஊர்ந்தாலும் ஏற்படும் கூச்சம் குறித்த பேரச்சம் கூச்ச வெருளி.
gargala என்னும் கிரேக்கச் சொல்லின் பொருள் கூச்சமூட்டு.
00

(தொடரும்)
இலக்குவனார் திருவள்ளுவன்
வெருளி அறிவியல் 2/5

வெருளி நோய்கள் 876-880: இலக்குவனார் திருவள்ளுவன்

ஃஃஃ    இலக்குவனார் திருவள்ளுவன்      26 December 2025      அகரமுதல

(வெருளி நோய்கள் 871-875)

வெருளி நோய்கள் 876-880

876. குறுந் தகட்டு வெருளி – Pactorbophobia

குறுந் தகடு தொடர்பான அளவுகடந்த பேரச்சம் குறுந் தகட்டு வெருளி.
ஒலி. ஒளி அலைப்பதிவுகள் சரியாக மேற்கொள்ளப் படவில்லையோ, கீறல் விழுந்த குறுந்தகடாக இருந்து சரியாக இசையையோ உரையையோ கேட்க முடியாமல் போகுமோ, கேட்கத்தகாதவை அல்லது பார்க்கத்தகாதவை பதிவாிகியருக்குமோ என்ற பேரச்சத்திற்கு ஆளா்வோர் உள்ளனர்.
00

877. குறுமிவெருளி – Ceresphobia

குறுமி(dwarf planet) குறித்த வரம்பற்ற பேரச்சம் குறுமிவெருளி.
dwarf planet என்றால் குள்ளன் என்கிறார்கள். அவ்வாறு சொல்வது உயர்திணையாகும். குறுமளவு உள்ள கோளைச் சுருக்கமாகக் குறுமி என்பது பொருத்தமாக இருக்கும்.
Ceres என்னும் இலத்தீன் சொல்லின் பொருள் குறுமி.
00

878. குறும்பி வெருளி – Kypselidaphobia

குறும்பி(earwax/cerumen) எனப்படும் காதுக்குள் சேரும் பசையான அழுக்கு குறித்த வரம்பு கடந்த பேரச்சம் குறும்பி வெருளி.
குறும்பியாகிய காதினுள் சேரும் பழுப்பு நிறமுடைய மெழுகு போன்ற பொருள் தானாகவே வெளியேறும் இயல்புடையது. இருந்தும் இது குறித்துப் பேரச்சம் கொள்வோர் உள்ளனர். ஆகவே, முறையற்ற வழியில் வெளியேற்ற முயன்று துன்பத்திற்கு ஆளாவர். இதனைக் கேள்வியுறுவோருக்குக் குறும்பியால் காது செவிடாகிவிடும் என்பதுபோன்ற அளவுகடந்த பேரச்சம் வருகிறது.
Kypselida என்பது கிரேக்கச்சொல்லில் இருந்து உருவான குறும்பி என்னும் பொருள் கொண்ட சொல்.
00

879. குறும்பு வெருளி – Pharsaphobia

குறும்பு தொடர்பான அளவுகடந்த பேரச்சம் குறும்பு வெருளி.
pharsa என்னும் கிரேக்கச் சொல்லிற்குக் குறும்பு எனப் பொருள்.
குழந்தைகள் அல்லது பிறர் செய்யும் குறும்புகள், இன்னல் விளைவிக்குமோ தீங்கு விளைவிக்குமோ என்ற பேரச்சத்திற்கு ஆளாவோர் உள்ளனர்.
சிறு குறும்பாகவோ கேலிக் குறும்பாகவோ விளையாட்டுக் குறும்பாகவோ தீங்கிலாக் குறும்பாகவோ தீங்கு தரும் குறும்பாகவோ எத்தகைய குறும்பாகவோ இருந்தாலும் பேரச்சம் கொள்வோர் உள்ளனர்.
00

880. குறை திறன் வெருளி – Atelophobia /Ordacleaphobia

செயல்பாட்டுத்திறன் குறைவாக இருப்பது தொடர்பான பேரச்சம் குறை திறன் வெருளி.
செயலில் நிறைவின்மையால் குறை காண்பது தொடர்பான அளவுகடந்த பேரச்சம் குறைமை / குறை திறன் வெருளி.
Ordacleaphobia என்பதற்குக் குறைபாட்டு வெருளி/நிறைவிலி வெருளி என இருவகையாகவும் முதலில் குறித்திருந்தேன். இரு வகையாகக் குறிக்க வேண்டா என்பதால் குறைமை வெருளி என ஒற்றைச் சொலலை மட்டும் இப்பொழுது குறித்துள்ளேன்.
குறைமை வெருளி(Ordacleaphobia)யும் குறைதிறன் வெருளியும் ஒன்றுதான். குறைமை வெருளி(Ordacleaphobia)ஐப் புதிய வெருளியாக வரையறுத்துள்ளனர். இரண்டையும் நாம் ஒன்றாகவே குறை திறன் வெருளி எனக் குறிக்கலாம்.
இவ் வெருளி உள்ளவர்கள், நேர்முகத் தேர்வுகளைச் சந்திக்க அஞ்சுவர். பணியில் நிலைப்பு இருக்காது, வேலை பறி போகும் என்று கவலை கொள்வர். திறமையை வளர்த்துக் கொள்வதில் கருத்து செலுத்துவதை விட குறைதிறனால் ஏற்படும் இடர்கள் பற்றியே கவலைப்படுவர்.
Atelo என்னும் கிரேக்க முன்னொட்டின் பொருள்கள் குறைவுற்ற; முழுமையற்ற.
orda+clea என்பவற்றின் கூட்டுப் பொருளும் முழுமையற்ற திறன்/குறை திறன் ஆகும்.
00

(தொடரும்)
இலக்குவனார் திருவள்ளுவன்
வெருளி அறிவியல் 2/5