வெருளி நோய்கள் 584-588: இலக்குவனார் திருவள்ளுவன்

 

ஃஃஃஃஃ  இலக்குவனார் திருவள்ளுவன்      26 October 2025   அகரமுதல    

(வெருளி நோய்கள் 579-583: தொடர்ச்சி)

வெருளி நோய்கள் 584-588

 585. ஓநாயன் வெருளி – Lupophobia / lycophobia/ Lukophobia

ஓநாய்/ஓநாய்மனிதன்/ஓநாயன் (werewolf)பற்றிய பெருங் கவலையும் பேரச்சமும் ஓநாயன் வெருளி.

ஓநாய் குறித்த பேரச்சத்தையும் இவ்வகையில்தான் சேர்த்துள்ளனர்.

ஓநாய்போன்ற மனிதன் எனவே, ஓநாயன் எனப்படுகிறான்.

lupus என்னும் இலத்தீன் சொல்லின் பொருளும் lykos என்னும் கிரேக்கச் சொல்லின் பொருளும் ஓநாய்.

00

586. ஓமர் வெருளி – Homerphobia

புனைவுரு  ஓமர் (Homer Simpson) தொடர்பான அளவுகடந்த பேரச்சம் ஓமர் வெருளி.

அமெரிக்க அசைவூட்டத் தொலைக்காட்சித் தொடரான ​​ சிம்பசன்னின் முதன்மைப் பாத்திரம் ஓமர் சே சிம்பசன்.00

587. ஓய்வறை நீங்கு வெருளி  – Abcellophobia

கழிவறையில் இருக்கும் பொழுது மேல் அலுவலர் உள்ளே நுழைவதான ஒலி கேட்கும் பொழுது எவ்வாறு வெளியேறுவது என அளவுகடந்த பேரச்சம் கொள்வது ஓய்வறை நீங்கு வெருளி. மேல் அலுவலர் வெளியேறும் வரை கழிவறைக்குள்ளேயே இருப்பர்.

கழிவறை நாற்றம், துப்புரவின்மை போன்றவற்றிற்குக் காரணமாகத் தன்னை நினைப்பர் என்ற கவலையால் வரும் பேரச்சமே இது.

கழிவறையை இடக்கர் அடக்கலாகக் குறிக்க வேண்டும் என்பதற்காகப் பிரெஞ்சுச் சொல்லான ஆயத்த அறை அல்லது ஒப்படனை அறை(toilet room) பயன்படுத்தப்பட்டது. பிரித்தானியர்  வாய்ப்பு நல அறை(convenience room) எனப்பயன்படுத்தினர். வட அமெரிக்கர்கள் ஓய்வறை (rest room) என்று பயன்படுத்தினர். இச்சொல்லே இப்போது நிலைத்து விட்டது.

தமிழில் மலங்கழித்தல் என்று சொல்லாமல், ‘கொல்லைக்குப் போதல்’ என்றனர். அதுவும் இடக்கர் அடக்கல் என்னும் நிலை மாறி வெளிப்படைச் சொல்லாக மாறியது. பின்னர், ஆலந்து மொழிச் சொல்லான கக்கூசு பயன்படுத்தப் பெற்றது. தமிழ்ச்சொல்லாக இல்லை என்பதால் நீரடி என்பது பயன்படுத்தப் பெற்றது. இப்போது தமிழ்நாட்டிலும் பொதுவிடக்கழிப்பறை ஓய்வறை என்னும் சொல்லால் குறிக்கப் பெறுகிறது.

இலத்தீனில் Ab என்றால் விலகி இருத்தல் (அறையை விட்டு நீங்கி யிருத்தல்)  cellula என்றால், சிற்றறை என்று பொருள்.

காண்க: கழிவறை வெருளி

00

588. ஓய்விருக்கை வெருளி –  Lechophobia

ஓய்விருக்கை(couche) தொடர்பான அளவுகடந்த பேரச்சம் ஓய்விருக்கை வெருளி

Lecho என்னும்இசுபானிய மொழிச்சொல் பொருள் படுக்கை. இதன் பிரெஞ்சு பொருள் couche என்பதாகும். இதன் பொருள் படுத்து இருத்தல் / கீழேஇருத்தல் / உறங்குதல் எனப் பொருள்கள்.

00

(தொடரும்)

இலக்குவனார் திருவள்ளுவன்

வெருளி அறிவியல் 2/5

வெருளி நோய்கள் 579-583: இலக்குவனார் திருவள்ளுவன்

ஃஃஃ     இலக்குவனார் திருவள்ளுவன்      25 October 2025      அகரமுதல

(வெருளி நோய்கள் 574-578: தொடர்ச்சி)

வெருளி நோய்கள் 579-583

579. ஓக்கலகோமா வெருளி- Oklahomaphobia 

ஓக்கலகோமா மாநிலம் தொடர்பான அளவுகடந்த பேரச்சம் ஓக்கலகோமா வெருளி.

ஓக்கலகோமா மாநிலம் ஐக்கிய அமெரிக்காவில் 46 ஆவதாக 1907 இல் இணைந்த மாநிலம். இதன் தலைநகரம்  ஓக்கலகோமா நகரம்.

00

 580. ஓங்கில் வெருளி  – Phocodelfiniphobia / Delfiniphobia

ஓங்கில் /கடற்பன்றி(dolphin)பற்றிய அளவுகடந்த பேரச்சம் ஓங்கில் வெருளி.

ஓங்கில் / கடற்பன்றி என்பது திமிங்கில இனத்தைச் சேர்ந்தது.

Dolphin/தால்பின் என்பதைத் தமிழில் கடற்பன்றி என்றும் கூறுகின்றனர். கடற்பன்றி இனத்திற்கு நெருக்கமான இனம் என்பதால் அவ்வாறு கூறுகின்றனர். எனினும் வேறுபடுத்த ஓங்கில் என்று குறிக்கின்றனர்.

00

581. ஓடுகள் வெருளி – Plakidiophobia

ஓடுகள் (tiles) தொடர்பான அளவுகடந்த பேரச்சம் ஓடுகள் வெருளி.

தரை ஓடுகள் வழுக்கிவிட்டுக் காயம் ஏற்படுத்தும், தசைப்பிடிப்பு, எலும்பு முறிவு முதலான வேறு நலிவுகளை ஏற்படுத்திவிடும் என இத்தகையோர் பேரச்சம் கொள்கின்றனர்.

00

 582. ஓட்ட வெருளி – Treximophobia

ஓடுதல் குறித்த காரணமற்ற அளவுகடந்த பேரச்சம் ஓட்ட வெருளி.

Treximo என்னும் கிரேக்கச் சொல்லின் பொருள் ஓட்டம்.

00

 583. ஓட்டுநர் வெருளி-Umersermophobia

வாடகை ஊர்தி ஓட்டுநர் மீதான அளவு கடந்த பேரச்சம் (வாடகை) ஓட்டுநர் வெருளி.

ஓட்டுநர் சிலரின் எரிச்சல் மூட்டும் பேச்சு, அவர்கள் வன்முறையில் ஈடுபடுவார்களோ என்ற  ஐயம், சிலரின் தோற்றம், வாடகை ஊர்தியில் கடத்தப்பட்ட செய்திகளால் ஏற்படும் கலக்கம் போன்றவற்றால் ஏற்படும் தேவையற்ற பேரச்சம் மனப்பதற்றம் முதலியவற்றை உருவாக்குகிறது.

00

(தொடரும்)

இலக்குவனார் திருவள்ளுவன்

வெருளி அறிவியல் 2/5

வெருளி நோய்கள் 574-578: இலக்குவனார் திருவள்ளுவன்

ஃஃஃ    இலக்குவனார் திருவள்ளுவன்      24 October 2025      அகரமுதல

(வெருளி நோய்கள் 569-573: தொடர்ச்சி)

வெருளி நோய்கள் 574-578

574. ஒறுப்பு வெருளி- Rhabdophobia/ Rhobdophobia/ Mastigophobia/Poinephobia

தண்டனை தொடர்பான அளவுகடந்த பேரச்சம் ஒறுப்பு வெருளி.

குறைகூறப்படுவோம், தண்டிக்கப்படுவோம், கழி, கம்பு, தடி, கம்பி, கோல், மந்திரக்கோல்  போன்றவற்றால் அடிக்கப்படுவோம் என்றெல்லாம் காரணமின்றி அச்சம் கொள்வர். குற்றங்கள் செய்து விட்டு அஞ்சாதிருப்பதுபோல் வெளியே காட்டிக்கொண்டு தண்டனை பற்றிய பேரச்சம்  கொள்வோர் உள்ளனர். பெரும் பெருங் குற்றங்கள் புரிந்து விட்டுச் செல்வாக்கால் தப்பித்து விட்டு அச்சம் இன்றி இருப்போரும் உள்ளனர்.

குற்றங்கள் செய்து விட்டு அஞ்சாதிருப்பதுபோல் வெளியே காட்டிக்கொண்டு சிறைத் தண்டனை பற்றிய பேரச்சம்  கொள்வோர் உள்ளனர். பெரும் பெருங் குற்றங்கள் புரிந்து விட்டுச் செல்வாக்கால் தப்பித்து விட்டு அச்சம் இன்றி இருப்போரும் உள்ளனர்.

ஒறுப்பு வெருளி என்பது குற்றங்குறை கூறப்படுவது, திறனாய்வு(விமரிசனம்)குறித்துப் பெருங்கவலையும் பேரச்சமும் கொள்வதையும் குறிக்கும். அரசியல் வாதிகள் பலருக்கும் குறிப்பாக ஆட்சிப் பொறுப்பில் உள்ளவர்களுக்கு இவ்வெருளி உள்ளது. இதன்அடையாம்தான் அரசு தேவையற்ற அவதூறு வழக்குகளைத் தொடுப்பது. செவிகைப்பச் சொற்பொறுக்கும் – வெறுக்கத்தகும் சொற்களையும் பொறுத்துக் கொள்ளும் – பண்பு இருந்தால் குறைகளைக் களையும் செயல்பாடு வருமே தவிரப் பேரச்சம் வராது.

rhabdo என்னும் கிரேக்கச் சொல்லிற்குக் கழி, கம்பு, தடி, கம்பி, கோல் முதலான பொருள்கள்.

poin என்னும் கிரேக்கச் சொல்லின் பொருள் தண்டனை.

mastigo என்னும் கிரேக்கச் சொல்லின் பொருள் கசையடி அல்லது பிரம்படி.

00

 575. ஒற்றைக் கொம்பன் வெருளி –  Monokerophobia 

 ஒற்றைக் கொம்பன்(unicorn) பற்றிய பெருங்கவலையும் பேரச்சமும் ஒற்றைக் கொம்பன் வெருளி.

ஒற்றைக் கொம்பன்  – ஒற்றைக் கொம்புள்ள குதிரை போன்ற வடிவுள்ள விலங்கு. –

00

 576. ஒற்றைப்படை வெருளி – Imparnumerophobia 

ஒற்றைப்படை எண் குறித்த வரம்பற்ற பேரச்சம் ஒற்றைப்படை  வெருளி.

impar, numerus ஆகிய இலத்தீன் சொற்கள் இணைந்து ஒற்றைப்படை எண் எனப் பொருள்.

00

 577. ஒன்பதன்கூறு வெருளி – Enatophobia  

ஒன்பதன்கூறுகள் குறித்த வரம்பற்ற பேரச்சம் ஒன்பதன்கூறு வெருளி.+ ஒன்பதாம் எண் வெருளி உள்ளவர்களுக்கு ஒன்பதன்கூறு வெருளி வர வாய்ப்புள்ளது.

00

 578. ஓகி வெருளி – Oggyphobia

புனைவுரு ஓகி தொடர்பான அளவுகடந்த பேரச்சம் ஓகி வெருளி.

ஓகி என்னும் பூனை   ஃபிரெஞ்சு தொலைக்காட்சி அசைவூட்டத் தொடர் ஒன்றில் இடம் பெறும் புனைவுரு பாத்திரம்.

00 

(தொடரும்)
இலக்குவனார் திருவள்ளுவன்
வெருளி அறிவியல் 2/5 

வெருளி நோய்கள் 569-573: இலக்குவனார் திருவள்ளுவன்

ஃஃஃஃஃ     இலக்குவனார் திருவள்ளுவன்      23 October 2025      அகரமுதல

(வெருளி நோய்கள் 564-568: தொடர்ச்சி)

வெருளி நோய்கள் 569-573

569. ஒளி வீச்சு வெருளி – Selaphobia

ஒளி வீச்சு குறித்த வரம்பற்ற பேரச்சம் ஒளி வீச்சு வெருளி.

கால் கை வலிப்பு உள்ளவர்களும் ஒற்றைத் தலைவலி உள்ளவர்களும் பெரிதும் ஒளி வெருளி உள்ளவர்களாக உள்ளனர். இத்தகையோர் இரவில் வெளியே செல்வதையும் இரவு மன்றங்களுக்குச் செல்வதையும் தவிர்க்க வேண்டும்.

selas என்னும் கிரேக்கச் சொல்லுக்கு ஒளி எனப் பொருள்.

காண்க: ஒளி வெருளி (Photophobia)

00

570. ஒளி வெருளி-Photo Phobia 

வெளிச்சம் கண்டு ஏற்படும் இயல்பு மீறிய பேரச்சம்  ஒளி வெருளி.

ஒளி வெருளி (Photophobia) என்பது பயிரியலில், ஒளியைக் கண்டு அஞ்சி ஒளி மறைவிடத்திற்கு அல்லது ஒளி இல்லா இடத்திற்குச் சென்று தங்கும் பூச்சிகளின் அல்லது பிற விலங்குகளின் இயல்பினை-ஒளிஎதிர் துலக்கத்தைக் குறிக்கும்.

கவிஞர் கண்ணதாசன், “எல்லாரும் எல்லாமும் பெற வேண்டும்” என்ற கருப்புப்பணத் திரைப்படப்பாடலில்

“இருட்டில் மறைந்து கொள்ள விளக்கணைப்பார்”

எனத் தவறான தொழில் புரிவோர் ஒளிக்கு அஞ்சுவதாகக் குறிப்பிட்டிருப்பார்.  மறைவான தொழில் புரிவோருக்கு ஒளி பகையாகிறது.

எனினும் ஒளியைக்கண்டு கூசுதல், ஒளியினால் கண்கள் பாதிப்புறும் என அஞ்சுதல். என ஒளி சார்ந்த கவலைகளால் ஒளி வெருளி உருவாகிறது.

சூரிய ஒளி வெருளி(Heliophobia)யும் ஒளி வெருளி போன்றதே.

Photo என்னும் கிரேக்கச் சொல்லிற்கு ஒளி என்றுதான் பொருள்.     Photograph  என்பதன் சுருக்கமாக Photo என்று சொன்னாலும் இங்கே ஒளியைத்தான் குறிக்கிறது.

00

571. ஒளியூடிப் பொருள் வெருளி – Diafanophobia

ஒளியூடிப் பொருள் / தெளி தெரி பொருள்(transparent object)  குறித்த வரம்பற்ற பேரச்சம் ஒளியூடிப் பொருள் வெருளி.

Diafano என்னும் கிரேக்கச் சொல்லிற்கு ஒளிபுகு/ஒளியூடி எனப் பொருள்.

00

572. ஒளிர் விளக்கு வெருளி – Fakosphobia

ஒளிர் விளக்கு( flashlight) தொடர்பான அளவுகடந்த பேரச்சம் ஒளிர் விளக்கு வெருளி.

காண்க: ஒளி வீச்சு வெருளி(Selaphobia)

00

573. ஒளிர்வு வெருளி-Photoaugliaphobia

ஒளிர்வது குறித்த தேவையற்ற பெருங்கவலையும் பேரச்சமுமே ஒளிர்வு வெருளி.

சூரிய ஒளி வெருளி(Heliophobia)யும் ஒரு வகையில் ஒளி வெருளி அல்லது ஒளிர்வு வெருளியே!

ஒளி என்னும் பொருளுடைய phōs என்னும் கிரேக்கச் சொல்லில் இருந்து வந்ததே Photo  என்னும் சொல்

aug என்னும் கிரேக்கச் சொல்லிற்கு மிகுதிப்பாடு என்று பொருள். ஒளி மிகுதியாகிப் பளபளப்பதை – ஒளிர்வதை  Photoauglia குறிப்பிடுகிறது.

00

(தொடரும்)

இலக்குவனார் திருவள்ளுவன்

வெருளி அறிவியல் 2/5

வெருளி நோய்கள் 564-568: இலக்குவனார் திருவள்ளுவன்

 ஃஃஃஃஃஃஃ    இலக்குவனார் திருவள்ளுவன்      22 October 2025      அகரமுதல

(வெருளி நோய்கள் 559-563: இலக்குவனார் திருவள்ளுவன்)

564. ஒவ்வாமை குறுமி வெருளி – Erisphobia

ஒவ்வாமை குறுமி(dwarf planet Eris) குறித்த வரம்பற்ற பேரச்சம் ஒவ்வாமை குறுமி வெருளி.

dwarf என அழைக்கப்படுவதை உயர்திணை போல குள்ளன் என்பது தவறு. dwarf planet  என்பதைக் குறுங்கோள் >குறுமி எனச்சொல்ல வேண்டும். 

00

565. ஒவ்வாமை வெருளி-Anaphylaxophobia /Allergiphobia

ஒவ்வாமை(Allergy) தொடர்பான அளவுகடந்த பேரச்சம் ஒவ்வாமை வெருளி.

உணவு ஒவ்வாமை, பயன்பாட்டுப் பொருள் ஒவ்வாமை, வளர்ப்பு விலங்குகள் அல்லது பறவைகள் ஒவ்வாமை போன்ற பல ஒவ்வாமைகள் உள்ளன. இவற்றால் வரும் பிற நோய்கள் குறித்துக் கவலையுற்று அளவுகடந்த பேரச்சம் கொள்கின்றனர்.

00

566. ஒழுங்கின்மை வெருளி – Ataxophobia

உடல்குலைவு/ஒழுங்கின்மை தொடர்பான வரம்பற்ற பேரச்சம் ஒழுங்கின்மை வெருளி.

a  என்னும் கிரேக்கச் சொல்லிற்கு இல்லை எனப் பொருள். taxo என்னும் கிரேக்கச் சொல்லிற்கு ஒழுங்கு எனப் பொருள்.

00

567. ஒளியூடாப் பொருள் வெருளி – Adiafanophobia

ஒளி யூடாப் பொருள்(opaque object) குறித்த வரம்பற்ற பேரச்சம் ஒளியூடாப் பொருள் வெருளி.

மரங்கள், மாழைகள், செங்கல், பைஞ்சுதை முதலிய ஒளி ஊடாப் பொருள்கள் மீது காரணமற்ற பேரச்சம் கொள்கின்றனர்.

00

568. ஒளி விலகல் வெருளி – Diathlasophobia

ஒளி விலகல்/கதிர்ச்சிதர்வு(refraction) குறித்த வரம்பற்ற பேரச்சம்  ஒளி விலகல் வெருளி.

சிலர் ஒளிவிலகலை ஒளிமுறிவு என்கின்றனர்.

00

(தொடரும்)

இலக்குவனார் திருவள்ளுவன்

வெருளி அறிவியல் 2/5

வெருளி நோய்கள் 559-563: இலக்குவனார் திருவள்ளுவன்

 இலக்குவனார் திருவள்ளுவன்      21 October 2025      No Comment

(வெருளி நோய்கள் 554-558 தொடர்ச்சி)

வெருளி நோய்கள் 559-563

 559. ஒலிப்பிக் கடிகார வெருளி –  Xypnitiriphobia

மணிஒலிப்பிக் கடிகாரம்(alarm clock) குறித்த வரம்பற்ற பேரச்சம் ஒலிப்பிக் கடிகார வெருளி.

விழிப்பிற்காக மணியை ஒலிக்கச்செய்யும் வாய்ப்பைப் பயன்படுத்துவதற்குரிய மணிப்பொறி, ஒலிப்பிக் கடிகாரம் ஆகும்.

00

560. ஒலிம்பிய வெருளி – Olympicphobia

ஒலிம்பிக்கு விளையாட்டுப் போட்டிகள் குறித்த வரம்பற்ற பேரச்சம் ஒலிம்பிய வெருளி.

பேரார்வமும் விடாமுயற்சியும் அளவற்ற நம்பிக்கையும் இருப்பினும் மறுபுறம் வாகைசூட இயலுமா என்ற கவலையும் சேர்வதால் ஒலிம்பிக்குப் போட்டிகளில் பங்கேற்பதில் பேரச்சம் கொள்கின்றனர்.

விளையாட்டு வெருளிபோன்றதுதான் இதுவும்.

00

561. ஒலி ஒளியிழை வெருளி – Cassettophobia

ஒலியிழை, ஒளியிழை குறித்த வரம்பற்ற பேரச்சம் ஒலி-ஒளியிழை வெருளி.

இழைகள் சிக்கிக்கொள்ளுதல் போன்ற காரணங்களால் பேரச்சம் கொள்கின்றனர். ஒலிப்பதியன் வெருளிக்குக் காரணமாய் அமைவதும் ஒலி-ஒளியிழை வெருளியே.

ஒலி இழை அல்லது ஒளி இழை அடங்கிய பெட்டகத்தைக் குறிப்பிடும் வகையில் ஆங்கிலத்தில் பெட்டக வெருளி என்கின்றனர்.

00

562. ஒலிவாங்கி வெருளி –  Microphonophobia

ஒலிவாங்கி குறித்த வரம்பற்ற பேரச்சம் ஒலிவாங்கி வெருளி.

நாம் பேசும் பொழுது ஒலி வாங்கிச் சரியாக வேலை செய்யாது, கர், குர் என்ற ஒலியை உடன் எழுப்புகிறது என்றெல்லாம் தேவையற்றுக் கவலைப்பட்டு ஒலி வாங்கி வெருளிக்கு ஆளாகின்றனர்.

00

 563. ஒல்லியன் வெருளி – Slendermanphobia

புனைவுரு ஒல்லியன்(Slenderman) குறித்த வரம்பற்ற பேரச்சம் ஒல்லியன் வெருளி.

ஒல்லி மனிதன் (Slender Man) என்பது புனைவுரு  பாத்திரம். இதனைச் சுருக்கமாக ஒல்லியன் எனக் குறித்துள்ளோம். மெலிந்த இயல்புக்கு மாறான உயரம் கொண்டதும், கூறுகள் இல்லாத தலையையும் முகத்தையும் கொண்டதும், கறுப்பு நிற உடை அணிந்ததுமான ஓர் உருவம். 2009இல் கைச்சுவை இணையத்தளப் பயனரான எரிக்கு நட்சன் (Eric Knudsen) என்பவரால் உருவாக்கப்பட்டது.

இலக்கியம், ஓவியம், நிகழ்படத் தொடர்கள் போன்ற ஊடகங்களில் ஒல்லியனைக் காண முடியும். ஒல்லியன்பற்றிய கதைகள் அவன் மக்களை – குறிப்பாகச் சிறுவர்களைப் பின் தொடர்தல், கடத்துதல், காயப்படுத்துதல் போன்றவற்றில் ஈடுபடுவதாகக் காட்டுகின்றன. ஆதலின் இதைப் பார்ப்போருக்கு – அவர்களுள் சிறுவர்க்கு – அச்சம் உருவாதல் இயற்கையே. கற்பனையை மெய்யாகக் கருதும் பொழுது ஒல்லியனால் தீங்கு நேரும் எனப் பேரச்சம் வளர்கிறது.

00

(தொடரும்)

இலக்குவனார் திருவள்ளுவன்

வெருளி அறிவியல் 2/5

வெருளி நோய்கள் 554-558: இலக்குவனார் திருவள்ளுவன்

 

இலக்குவனார் திருவள்ளுவன்      20 October 2025      No Comment

(வெருளி நோய்கள் 549-553: தொடர்ச்சி)

வெருளி நோய்கள் 554-558

554. ஒருக்க வெருளி – Tongyiphobia

ஒருக்கம்(sameness) தொடர்பான அளவுகடந்த பேரச்சம் ஒருக்க வெருளி.

நம்மிடம் இருக்கும் ஆடை/நகை/பொருள்போன்ற ஒன்றைப் பிறர் வாங்கித் தருதல், நம்மிடம் இருப்பதுபோன்ற ஒன்றைப் பிறர் அல்லது பிறரிடம் இருப்பதுபோன்ற ஒன்றை நமக்கு வாங்குதல் போன்ற சூழல்களில் காரணமற்ற தேவையற்ற வெறுப்பும் பேரச்சமும் கொள்கின்றனர். நம் பிள்ளைகள்போல் பிறர் பிள்ளைகளும் படிப்பிலோ விளையாட்டிலோ ஒத்து இருந்தாலும் பேரச்சம் கொள்வோர் உள்ளனர்.

ஒருக்கம்(sameness) = ஒரேபடித்தான நிலை/ஒரே தன்மை /ஒத்த தன்மை.

00

555. ஒரே உடை வெருளி – Idemophobia

தொடர்ந்த ஒரே உடையை அணிவது குறித்த அளவுகடந்த பேரச்சம் ஒரே உடை வெருளி.

உடுப்பினை மாற்றாமல் அதே உடையை அணிந்து இருப்பதனால் தேவையற்ற வெறுப்பிற்கும் பேரச்சத்திற்கும் ஆளாகின்றனர். இதனைப் பெண்களுக்கான வெருளியாகக் குறிப்பிடுகின்றனர். பெண்கள் ஆடை அணிந்து அழகு பார்ப்பதில் கூடுதல் கருத்து செலுத்துபவர்கள் என்பதை மறுப்பதற்கில்லை. அதே நேரம் ஆண்களும் பெண்கள் தங்களைப்பார்க்க வேண்டும் என்பதற்காக நாளும் பொழுதும் ஆடைமாற்றுவதில் கருத்தாக இருப்பார்கள். உழைப்பாளிகள் இதில் கருத்து செலுத்தாமல் இருக்கலாம். ஆனால், கொண்டாடப்படும் பெயராளிகள்(celebrities) உடைகளிலும் கருத்து செலுத்துபவர்களே! வகைவகையான உடை அணிந்த ஆடவர் இதழ்களின் அட்டைகளில் இடம் பெறுவதும் பல்வேறு விளம்பரத் தோற்றங்களில் இடம் பெறுவதும் இதற்குச் சான்றுகளாகும்.

 00

556. ஒலி பெருக்கி வெருளி –  Megaphonophobia

ஒலி பெருக்கி தொடர்பான அளவுகடந்த பேரச்சம் ஒலி பெருக்கி வெருளி.

வெளியிடங்களில் கூட்டத்தினரிடையே அல்லது தொலைவில் உள்ளவர்களை அழைக்க ஒலியைப் பெரிதாக்கப் பயன்படும் கூம்புவடிவிலான ஏந்துவே ஒலி பெருக்கி. சிலர் அரங்கிற்குள்ளும் ஒலி பெருக்கியைப் பயன்படுத்தும் பொழுது ஒலியை அளவுக்கு மீறி வைப்பதால் கேட்போர் எரிச்சலுறுகிறார்கள். அரசு கூம்பு வடிவ ஒலி பெருக்கிக்குத் தடை விதித்துள்ளது.இருப்பினும் பயன்படுத்துவோர் உள்ளனர்.

 ஒலி வெருளி உள்ளவர்களுக்கு ஒலி பெருக்கிவெருளியும் வர வாய்ப்புள்ளது.

00

557. ஒலி வெருளி  – Phonophobia/Sonophobia

குரலொலி, உரத்துப் பேசுதல், தொலைபேசி ஒலி, பிற ஒலி முதலியவற்றால் ஏற்படும் இயல்பு மீறிய பேரச்சம் ஒலி வெருளி. 

தொலைபேசி வந்தபின் தொலைபேசி அச்சமும் ஒலி வெருளியில் அடங்கிவிட்டது.

இரைச்சல் வெருளி(Acousticophobia) போன்றதுதான் இதுவும்.

phōnē என்னும் கிரேக்கச் சொல்லின் பொருள் ஒலி என்பதுதான். ஆனால், இப்பொழுது ஒலி வரும் கருவியை நாம் phone  என்று கூறுகிறோம்.

00

558. ஒலிப் பதியன் வெருளி –  Magnitofonophobia

ஒலிப் பதியன் குறித்த வரம்பற்ற பேரச்சம் ஒலிப் பதியன் வெருளி.

ஒலிப்பதியன் பயன்படுத்தும்பொழுது ஒலிஇழை சிக்கிக் கொள்ளும், மீள்பதிவோ கேள்பதிவோ சரியாக வேலைசெய்யாது என்று கருதிக் கவலை கொள்வோர் உள்ளனர். 00

(தொடரும்)

இலக்குவனார் திருவள்ளுவன்

வெருளி அறிவியல் 2/5