வெருளி நோய்கள் 1431 -1435: தொடர்ச்சி)
வெருளி நோய்கள் 1436 -1440
- நன்னீர் மீன் வெருளி – Pestrofaphobia
நன்னீர் மீன் வெருளி – Pestrofaphobia
நன்னீர் மீன்(trout) குறித்த வரம்பற்ற பேரச்சம் நன்னீர் மீன் வெருளி.
ஒருவரின் கடந்த கால அதிர்ச்சிகரமான நிகழ்வுகளால் மீன் வெருளி தூண்டப்படலாம். அவ்வாறில்லாமல் எதிர்பாராத விதமாகவும் மீன் வெருளி ஏற்படலாம்.
மீன்களைப் பார்ப்பது, முகர்வது, கேட்பது, தொடுவது மற்றும் உண்பது குறித்த பேரச்சத்தைக் குறிப்பிடும் மீன்வெருளி(Ichthyophobia) உள்ளவர்களுக்கு நன்னீர் மீன் வெருளி வரும் வாய்ப்பு உள்ளது.
Pestrofa என்னும் கிரேக்கச் சொல்லிற்கு நன்னீர் மீன் எனப் பொருள்..
00
- நாகற்பழ வெருளி – Vatomourophobia
நாவற்பழம் அல்லது நாகற்பழம் மீதான வரம்பற்ற பேரச்சம் நாகற்பழ வெருளி.
நாவற் பழம், இரத்தத்தில் உள்ள சருக்கரை அளவைக் குறைக்கவும் இரத்த அழுத்தத்தைக் குறைக்கவும் உதவும். எனினும் முன்னரே குறைந்த சருக்கரை அளவும் குறைவான இரத்த அழுத்தமும் இருப்பின் மேலும் குறைந்து உடற் தீங்கு ஏற்படும், மயக்கம் வரலாம், உயிருக்குக் கேடு வரலாம் என அஞ்சுவோர் உள்ளனர்.
Vatomouro என்னும் கிரேக்கச் சொல்லின் பொருள் நாவற்பழம்.
00
- நாக்கு வெருளி -Glossaphobia
நாக்கு குறித்த வரம்பற்ற பேரச்சம் நாக்கு வெருளி.
சக்கரவர்த்தி திருமகள் படத்தில் போட்டிப்பாடலில்
உலகத்திலே பயங்கரமான ஆயுதம் எது?
நிலைக்கெட்டுப் போன நயவஞ்சகரின் நாக்குதான் அது
என வினா-விடை வரும்.
எனவேதான் திருவள்ளுவரும்
யாகாவார் ஆயினும் நாகாக்க காவாக்கால்
சோகாப்பர் சொல்லிழுக்குப் பட்டு (குறள் 127)
என்கிறார். எனவே நாக்கு குறித்து விழிப்பு தேவைதான். ஆனால், தேவையற்ற சூழலில் காரணமின்றிப் பேரச்சம் கொண்டு வெருளிக்கு ஆளாகின்றனர் சிலர்.
00
- நாடக வெருளி – Dramaphobia/Theatrophobia
நாடகம் குறித்த வரம்பற்ற பேரச்சம் நாடக வெருளி.
நாடகக் கலைஞர்கள், குறிப்பாகப் பெண்கலைஞர்கள் குறித்து ஒழுக்கமற்றவர்கள் எனத் தவறாகக் கருதுவதால், நாடகம் பார்ப்பவர்கள் தீய வழிக்குச் செல்வர் என நாடகம் குறித்தும் பேரச்சம் கொள்கின்றனர்.
துன்பக் காட்சிகளும் வன்முறைக் காட்சிகளும் கயவர்கள் புரியும் கயமைக் காட்சிகளாலும் நாடகம் மீது பேரச்சம் கொள்வோர் உள்ளனர்.
காண்க: நாட்டியவெருளி(Choreophobia/Chorophobia/saltaphobia/Saltophobia)
00
- நாடகத் தொடர் வெருளி -sapophobia
தொலைக்காட்சித் தொடர்களைப் பார்ப்பது குறித்த அளவுகடந்த பேரச்சம் நாடகத் தொடர் வெருளி.
காட்சித் தொடர் என்று சொன்னால் கதையில்லாத பிற தொடர்களையும் குறிக்கும். பொதுவாகக் கதைத்தொடர்களால் வரும் பேரச்சங்களையே குறிப்பதால் நாடகத் தொடர் எனலாம்.
sapo என்னும் கிரேக்கச்சொல்லின் பொருள் நாடகத் தொடர்.
00
(தொடரும்)
இலக்குவனார் திருவள்ளுவன்
வெருளி அறிவியல் 3/5
