(வெருளி நோய்கள் 1611-1615 தொடர்ச்சி)
வெருளி நோய்கள் 1616-1620
- பரந்த சிந்தனை வெருளி – Librophobia
பிறரின் பரந்த சிந்தனை குறித்த அளவுகடந்த பேரச்சம் பரந்த சிந்தனை வெருளி.
Librophobia என்றால் சிலர் புத்தக வெருளி என்கின்றனர். இது தவறு. Libro என்பது புத்தகத்தைக் குறித்தாலும் புத்தகங்களைப் படிப்பதால் ஏற்படும் பரத்த சிந்தனையையே இங்கே குறிக்கிறது. புத்தகங்கள் மீதான பேரச்சத்தை நூல் வெருளி – Biblio phobia என்பர்.
00
- பரவிசை வெருளி – Poppuphobia
பரவிசை(pop music) தொடர்பான அளவுகடந்த பேரச்சம் பரவிசை வெருளி.
மக்களால் பரவலாக வரவேற்கப்படும் இசை வடிவம். எனவே பரவிசை எனலாம்.
இசை வெருளி உள்ளவர்களுக்குப் பரவிசை வெருளி வர வாய்ப்புள்ளது.
ஒரே வகையான திரும்பத் திரும்ப வரும் ஒலிகளால் எரிச்சலுற்று பரவிசை வெருளிக்கு ஆளாகின்றனர்.
00
- பரி வெருளி – Equinophobia/Hippophobia
குதிரையேற்றம் குறித்த தேவையற்ற மிகையான பேரச்சம் பரி வெருளி.
நல்ல பயிற்சி பெற்ற குதிரையாக இருந்தாலும் உதைக்கும், தாக்கும், கீழே தள்ளும் என்றெல்லாம பேரச்சம் கொள்வர்.
“குதிரை கீழே தள்ளியதோடு குழியையும் பறித்ததாம்” என்னும் பழமொழியை எண்ணிக் குதிரை, இடையிலேயே கீழே தள்ளிவிடும் என்று அஞ்சுவர்.
அமரகத்து ஆற்றறுக்கும் கல்லா மா அன்னார்
தமரின், தனிமை தலை
என்று திருவள்ளுவர் (திருக்குறள் 814) பயிற்சி இல்லாக் குதிரை போர் முனையில தன் மீதுஉள்ள வீரனைக் கீழேதள்ளிவிட்டு ஓடும் என்கிறார். இதனை எல்லாக் குதிரைக்கும் பொருத்திப்பார்த்துக் குதிரை மேல் செல்வதற்கும் குதிரை வண்டியில் பயணம் செய்வதற்கும் அஞ்சுவர்.
குதிரைவெருளி-Oicophobia என முதலில் குறிப்பிட்டிருந்தேன். Oicophobia என்பது ஒலிப்பில் Oikophobia உடன் தொடர்பு படுத்தப்பட்டு மனைப்பொருள் வெருளி எனப் பொருள் கொள்ளப்படுகிறது. எனவே, இதனை நீக்கி விட்டேன்.
equus என்னும் இலத்தீன் சொல்லின் பொருளும் hஅppos என்னும் கிரேக்கச்சொல்லின் பொருளும் குதிரை.
00
- பரிசுத் திறப்பு வெருளி – Doronophobia
பரிசுப் பொதியைத்(Gift Parcel) திறப்பது குறித்த வரம்பற்ற பேரச்சம் பரிசுத் திறப்பு வெருளி.
பரிசுப்பெட்டிகளை அல்லது பரிசுப் பொதிகளைத் திறக்கும் பொழுது அவற்றுள் பேரிடர் விளைவிக்கும் பொருள் இருக்கலாம் அல்லது விரும்பத்தகாத பொருள் இருக்கலாம் அல்லது உயிர் பறிக்கக்கூடிய வெடி பொருள் ஏதும் இருக்கலாம் என ஏற்படும் ஒரு பகுத்தறிவற்ற பயம் ஆகும். இந்த அச்சம் பலருக்குக் குழந்தைப் பருவத்தில் இருந்தே உருவாகிறது.
Doron என்பது பரிசு என்னும் பொருள் கொண்ட, ஈபுரு மொழியிலும் பழங்கிரேக்க மொழியிலும் உள்ள சொல்லாகும்.
00
- பரு மூ மா வெருளி-Brontosaurusphobia பரு மூ மா(brontosaur) குறித்த வரம்பற்ற பேரச்சம் பரு மூ மா வெருளி.
brontē என்னும் கிரேக்கச் சொல்லிற்கு இடி என்றும் sauros என்னும் கிரேக்கச் சொல்லிற்குப் பல்லி என்றும் பொருள். brontosaur என்பதன் பன்மை brontosauruses
இம் மூ மா, மெல்லிய நீண்ட கழுத்தையும் சிறிய தலையையும் பருத்த உடலையும் நீண்ட சாட்டை போன்ற வாலையும் உடையது. நேர் பொருளாக இடி பல்லி எனக் குறிக்காமல், பருத்த உடல் அடிப்படையில் பரு மூ மா எனக் குறித்துள்ளேன்.
00
(தொடரும்)
இலக்குவனார் திருவள்ளுவன்
வெருளி அறிவியல் 3/5
