வெருளி நோய்கள் 684-688: இலக்குவனார் திருவள்ளுவன்

 ஃஃஃஃ     இலக்குவனார் திருவள்ளுவன்      15 November 2025      அகரமுதல

(வெருளி நோய்கள் 679-683: தொடர்ச்சி)

வெருளி நோய்கள் 684-688

684. கலவை வண்டி வெருளி – Seemptuophobia

கற்காரை கலவை வண்டி (cement truck) தொடர்பான அளவு கடந்த பேரச்சம் கலவை வண்டி வெருளி.

கற்காரை கலவை(concrete mixer/cement mixer)வண்டி, கற்காரை சுமை வண்டி(cement truck) எனப்படுகிறது. எனினும் கற்காரையைச் சுமந்து செல்லும் பார வண்டியே கற்காரை சுமை வண்டி. வேறு எதையாவது சுமந்து செல்லும் பொழுது அப்பொருளின் பெயரில் அழைக்கப்பெறும்.  எனவே, இங்கே இது கலவை வண்டியையே குறிக்கிறது.

00

 685. கலவைப்பண்ட வெருளி – Crustumphobia/Pastrophobia

பழம் இறைச்சி கலந்த பண்ணியம்(Pie) குறித்த வரம்பற்ற பேரச்சம் கலவைப்பண்ட வெருளி.

பண்ணியம் செய்வதிலோ அல்லது அதை உண்பதிலோ பேரச்சம் ஏற்படுவதுண்டு.

00

 686. கலன் வண்டி வெருளி – Dochogophobia

கலன் வண்டி(tank truck)குறித்த அளவு கடந்த பேரச்சம் கலன் வண்டி வெருளி.

கலன் வண்டி என்பது எரிநெய், தண்ணீர், எரி வளி முதலியனவற்றை எடுத்துச் செல்லும் தொட்டி உடைய சுமை வண்டி.

00

687. கலிபோர்னிய வெருளி – Californiaphobia

கலிபோர்னிய மாநிலம் குறித்த வரம்பற்ற பேரச்சம் கலிபோர்னிய வெருளி.

கலிபோர்னியா ஐக்கிய அமெரிக்கா நாட்டின் மேற்குப்பகுதியின் தென்பாதியைக் கொண்டு அமைந்துள்ள ஒரு பெரிய மாநிலமாகும். அமெரிக்கத் தொல்குடி மக்கள் பிற பகுதிகளைக் காட்டிலும் இங்கே மிகுதியாக வாழ்ந்துள்ளனர். அமெரிக்காவின் 31 ஆவது மாநிலமாக 1850இல் மாறியது.

கலிபோர்னியா மக்கள், தொழில்கள், விளை பொருள்கள், பண்பாடு, நாகரிகம் முதலானவற்றின் மீது ஏற்படும் அளவு கடந்த பேரச்சமே கலிபோர்னியா வெருளியாக உருவெடுக்கிறது.

00

 688. கலிலி வெருளி – Callistophobia

வியாழன் கோளைச்சுற்றும் இரண்டாவது பெரிய உலவியான கலிலி உலவி மீதான அளவுகடந்த பேரச்சம் கலிலி வெருளி.

கலிலியோ கலிலியினால் (Galileo Galilei) 1610ஆம் ஆண்டு சனவரி 7 ஆம் நாள் கண்டுபிடிக்கப்பட்ட உலவிக்கு அவர் பெயரில் கலிலி உலவி எனச் சூட்டப்பட்டது. இக்கலிலி உலவி மீதான காரணமற்ற பேரச்சத்தைத்தான் கலிலி வெருளி என்கின்றனர். இங்கே கலிலி என்பது கலிலியோ கலிலியைக் குறிக்காமல் அவர் பெயரிலான கலிலி உலவியைத்தான் குறிக்கிறது.

இதனை நான் முதலில் பேரழகு நிலா வெருளி எனக் குறிப்பிட்டிருந்தேன். இன்றைக்கு நிலா என்பது சந்திரனைக் குறிப்பதால் தவறான பொருள் கொள்ள நேரிடும் என்பதாலும் moon என்பதை உலவி எனக் குறிக்க வேண்டும் என நானே குறித்திருந்ததாலும் கண்டறிந்தவர் பெயரில் கலிலி உலவி வெருளி என இப்பொழுது குறித்துள்ளேன்.

00

(தொடரும்)

இலக்குவனார் திருவள்ளுவன்

வெருளி அறிவியல் 2/5

வெருளி நோய்கள் 679-683: இலக்குவனார் திருவள்ளுவன்

 

ஃஃஃ     இலக்குவனார் திருவள்ளுவன்      14 November 2025      அகரமுதல

(வெருளி நோய்கள் 674-678: தொடர்ச்சி)

வெருளி நோய்கள் 679-683

679. கரையான் வெருளி-Isopterophobia

கரையான் முதலான மரம் அரிப்புப் பூச்சிகள் மீதான அளவுகடந்த பேரச்சம் கரையான் வெருளி.

பூச்சிகளால் அரிக்கப்படாத மரக்கலன்கள் என்று உறுதி அளித்தாலும் சிலர் பூச்சிகள் அரிக்கப்படும் என்று பேரச்சத்தில்தான் இருப்பர்.

00

680. கலங்கரை விளக்க வெருளி – Hotatsosphobia

கலங்கரை விளக்கம் குறித்த வரம்பற்ற பேரச்சம் கலங்கரை விளக்க வெருளி.

உயர வெருளி உள்ளவர்களுக்குக் கலங்கரை விளக்கவெருளி வருகிறது.

00

 681. கலப்பி வெருளி – Blenderphobia/Blendaphobia

கலப்பான்/கலப்பி (blender) குறித்த வரம்பற்ற பேரச்சம் கலப்பி வெருளி.

கலப்பான் அல்லது கலப்பியை இயக்கும் பொழுது ஏற்படும் ஒலியினால் இதன் மீது பேரச்சம் கொள்கின்றனர் சிலர். எனவே,ஒலி அல்லது இரைச்சல் வெருளி உள்ளவர்களுக்கும் இவ்வெருளி வரும் வாய்புள்ளது.

00

 682. கலப்பிசை வெருளி – Burusuphobia

கலப்பிசை(blues music) குறித்த வரம்பற்ற பேரச்சம் கலப்பிசை வெருளி.

அவலமும் அல்லலும் என்னும் பொருள் உடைய blue devils என்பதிலிருந்து Blues என்னும் சொல் உருவானது.

00

 683. கலராடோ வெருளி – Coloradophobia

கலராடோ(Colorado) மாநிலம் தொடர்பான அளவுகடந்த பேரச்சம் கலராடோ வெருளி.

கலராடோ ஐக்கிய அமெரிக்காவில் 38 ஆவது மாநிலமாக 1876 இல் இணைந்தது. இதன் தலைநகரம் தென்வர்(Denver).

00

(தொடரும்)

இலக்குவனார் திருவள்ளுவன்

வெருளி அறிவியல் 2/5

வெருளி நோய்கள் 674-678: இலக்குவனார் திருவள்ளுவன்

 ஃஃஃ       இலக்குவனார் திருவள்ளுவன்      13 November 2025      அகரமுதல

(வெருளி நோய்கள் 669-673: தொடர்ச்சி)

வெருளி நோய்கள் 674-678

674. கருவண்ண வெருளி-Melanophobia

கருநிறத்தைக் கண்டு ஏற்படும் தேவையற்ற பேரச்சம் கருவண்ண வெருளி.

கரு வண்ணத்தைத் துயரத்தின் அடையாளமாகக் கருதுவதாலும் துன்பத்தின் குறியீடாகக் கருதுவதாலும் சிலருக்குக் கரு வண்ணத்தைக் கண்டால் வெறுப்பும் அச்சமும் வருகிறது.

பல நாடுகளில் நீதிமன்றங்களில் நீதிபதிகள், வழக்குரைஞர்கள் முதலானவர்களின் மேலாடையின் நிறம் கருப்பு. இது அங்கே அதிகாரத்தின் அடையாளமாகக் கருதப்படுகிறது. இதனாலும் கருப்பு நிறம் கண்டு பேரச்சம் கொள்வோர் உள்ளனர்.

கருப்புதான் எனக்குப்பிடித்த வண்ணம் என்ற முறையில் வெற்றிக்கொடி கட்டு என்னும் திரைப்படத்தில் பா.விசய் பாடல் இடம் பெற்றிருக்கும். இதுபோன்ற எண்ணங்கள் வளர்ந்தால் கருநிறம் மீதான பேரச்சம் விலகும்.

melano என்னும் கிரேக்கச் சொல்லின் பொருள் கருப்பு நிறம்.

00

675. கருவி வெருளி – Ergaleiophobia

கருவி குறித்த வரம்பற்ற பேரச்சம் கருவி வெருளி.

கருவியைப் பயன்படுத்தும் பொழுது வரும் தேவையற்ற மிகையச்சம் கருவிப்பயன்பாட்டு வெருளி. கருவியைப் பார்த்தாலே வரும் காரணமற்ற பேரச்சம் கருவி வெருளி.

காண்க: கருவிப்பயன்பாட்டு வெருளி(Ergaleophobia)

00

 676. கருவிப்பயன்பாட்டு வெருளி – Ergaleophobia

கருவிப்பயன்பாடு குறித்த வரம்பற்ற பேரச்சம் கருவிப்பயன்பாட்டு வெருளி.

கருவியைப் பார்த்தாலே வரும் காரணமற்ற பேரச்சம் கருவி வெருளி. கருவியைப் பயன்படுத்தும் பொழுது வரும் தேவையற்ற மிகையச்சம் கருவிப்பயன்பாட்டு வெருளி.

காண்க: கருவி வெருளி(Ergaleiophobia)

00

 677. கருவிப் பெட்டி வெருளி – Sgmophobia

கருவிப் பெட்டி தொடர்பான அளவுகடந்த பேரச்சம் கருவிப் பெட்டி வெருளி.

கருவி வெருளியும் கருவிப்பயன்பாட்டு வெருளியும் உடையவர்களுக்குக் கருவிப்பெட்டி வெருளி இருக்க வாய்ப்புள்ளது.

காண்க: கருவியக வெருளி(Dntophobia)

00

 678. கருவியக வெருளி – Dntophobia

கருவிக் கொட்டகம் தொடர்பான அளவுகடந்த பேரச்சம் கருவிக் கொட்டக வெருளி.

கருவிப்பெட்டி எடுத்துச் செல்லக்கூடியதாகவும் ஊர்திமனை முதலான இடங்களில் மாட்டி வைத்திருக்கக் கூடியதாகவும் உள்ளன.

காண்க: கருவிப் பெட்டி வெருளி(Sgmophobia)

00

(தொடரும்)

இலக்குவனார் திருவள்ளுவன்

வெருளி அறிவியல் 2/5

வெருளி நோய்கள் 669-673: இலக்குவனார் திருவள்ளுவன்

ஃஃஃ      இலக்குவனார் திருவள்ளுவன்      12 November 2025      அகரமுதல

(வெருளி நோய்கள் 664-668: தொடர்ச்சி)

வெருளி நோய்கள் 669-673

669. கருச்சிதைவு வெருளி -Staniophobia

கருச்சிதைவுபற்றிய பெருங்கவலையும் பேரச்சமும் கருச்சிதைவு வெருளி.

கருச்சிதைவு வெருளி உள்ளோரில் ஒரு பகுதியினர் கருத்தடைக்கும் பேரச்சம் கொள்வோராக உள்ளனர்.

00

670. கருத்து வெருளி – Doxphobia/Genviaphobia

கருத்து குறித்த வரம்பற்ற பேரச்சம் கருத்து வெருளி.

எதற்கெடுத்தாலும் கருத்துரை சொல்வோர் உள்ளனர். அவ்வாறு கருத்துரை சொல்வது சிலருக்குப் பிடிக்காது. சில நேரம் செயல்பாடுகள் குறித்த கருத்துரையை நல்ல நோக்கததில் சொன்னாலும் எரிச்சல் அடைந்து வெறுப்பர். யாரும் கருத்துரை சொன்னால் அது குறித்துத் தேவையற்ற பேரச்சம் கொள்வர். தம்மிடம் கருத்து கேட்டாலும் சொல்வதற்கு அஞ்சி ஓடி ஒளிவர். தவறான கருத்துகள் சொல்ல நேர்ந்து அதனால் தீய விளைவுகள் நேரும் என அச்சப்படுவர்.  தொலைக்காட்சி வாதுரைகளில் சொல்லப்பட்ட கருத்துகளால் பதவி இழந்தவர் உண்டு.பொதுவாழ்வில் இவ்வாறு தவறான கருத்து சொல்லிப் பதவி இழந்தவர் நிலையைப் பார்த்தும்கருத்து சொல்ல அச்சம் வரும்.

மக்களிடம் தெருக்களில் கருத்து கேட்பதின் மீதான வெறுப்பையும் பேரச்சத்தையும் குறிக்கும் வகையில் Genviaphobia கூறப்பெறுகிறது. கருத்துக் கணிப்பிற்காக வினா தொடுப்பவர்கள் மீதும் நன்கொடை திரட்ட வரும் தொண்டு நிறுவனத்தினர் மீதும் தேவையின்றி ஏற்படும் அளவு கடந்த பேரச்சம் கருத்துக் கணிப்பர் வெருளி(Genviaphobia) என்று தனியாகப் புதிய வெருளியில் சேர்க்கப்பட்டுள்ளது

இவ்வாறு தனியாகக் குறிக்க வேண்டா. இதுவும் அடிப்படையில் கருத்து வெருளிதான். எனவே, இதிலேயே சேர்க்கப்பட்டுள்ளது.

dox என்னும் கிரேக்கச் சொல்லிற்குக் கருத்துரை எனப் பொருள்.

Doxophobia என்பது புகழ்ச்சி வெருளியைக் குறிக்கும். அதுவும் கருத்துரைதான் என்றாலும் வேறுபட்டது.

gens என்னும்பிரெஞ்சு சொல்லின் பொருள் மக்கள்.

via என்னும் இலத்தீன் சொல்லின் பொருள் தெரு.

00

 671. கருந்துளை வெருளி – Melanoheliophobia

கருந்துளை குறித்த வரம்பற்ற பேரச்சம் கருந்துளை வெருளி.

கருந்துளை  அல்லது கருங்குழி (Black Hole) என்பது, இவற்றின் எல்லைக்குட் செல்லும், ஒளி முதலான  எதுவுமே வெளியேற முடியாத அளவு வலுவான ஈர்ப்புச் சத்தியைக் கொண்டுள்ள, அண்டவெளியின் ஒரு பகுதி. இந்த எல்லை நிகழ்வெல்லை (event horizon) எனப்படும். இந்த நிகழ்வெல்லைக்குள் இருந்து பார்க்கக்கூடிய ஒளி அலைகள் போன்ற மின்காந்த அலைகள் கூடத் தப்பி வெளியேற முடியாது என்பதால் உள்ளே நடப்பவை எவற்றையுமே வெளியில் இருந்து அறிந்து கொள்ள முடியாது. இதனாலேயே இதனைக் கருந்துளை/கருங்குழி என்கின்றனர். இது குறித்த பேரச்சமே கருந்துளை வெருளி.

00

 672. கரும்பறவை வெருளி – Kotsyfiphobia

கரும்பறவை(blackbird) குறித்த வரம்பற்ற பேரச்சம் கரும்பறவை வெருளி.

பறவை வெருளி உடையவர்களுக்குக் கரும்பறவை வெருளி வரும் வாய்ப்பு உள்ளது.

Kotsyfi என்னும் கிரேக்கச் சொல்லின் பொருள் கரும் பறவை.

00

 673. கரும்பூனை வெருளி – Mavrogatphobia

கரும்பூனைபற்றிய பெருங்கவலையும் பேரச்சமும் கரும்பூனை வெருளி.

நம் நாட்டில் பூனை குறுக்கே வருவதைத் தீக்குறியாகக் கருதுகின்றனர். மேனாடுகளில் கருப்புப் பூனையையப் பார்ப்பதைத் தீங்கு நேருவதன் அறிகுறியாகக் கருதுகின்றனர்.

Mavrogat என்பது விளையாட்டு ஒன்றில்  கருப்புப் பூனை ஒன்றிற்குச் சூட்டிய பெயர்.அதுவே Mavrogat என்றால் கருப்புப் பூனை என்றாயிற்று.

00

(தொடரும்)

இலக்குவனார் திருவள்ளுவன்

வெருளி அறிவியல் 2/5

வெருளி நோய்கள் 664-668: இலக்குவனார் திருவள்ளுவன்

ஃஃஃ       இலக்குவனார் திருவள்ளுவன்      11 November 2025    அகரமுதல

(வெருளி நோய்கள் 659-663: தொடர்ச்சி)

வெருளி நோய்கள் 664-668

664. கரிம உயிர்ம வெருளி-Monoxeidioanthrakaskisiphobia

கரிம உயிர்மப் பயன்பாட்டுத்  தொடர்பான அளவுகடந்த பேரச்சம் கரிம உயிர்ம வெருளி.

இணையத் தளங்களில் விரிவான விளக்கம் கண்டுணர்க.

00

 665. கரிம உயிர்வளிம வெருளி-Monoxeidioanthrakaphobia

நிறமற்ற மணமற்ற சுவையற்ற நச்சுத் தன்மை மிகக கரிம உயிர் வளிமம் (கார்பன் மோனாக்சைடு) மீதான அளவு கடந்த பேரச்சம் கரிம உயிர்வளிம வெருளி.

00

 666. கரிய நீர் வெருளி – Cocaphobia

கரிய மென்னீர் கொக்கொ கோலா குறித்த வரம்பற்ற பேரச்சம் கரிய நீர் வெருளி.

கரியநீர், குளியல் அறை, கழிவுகலன் முதலியவற்றைத் தூய்மை செய்யக்கூடிய தன்மையது; எனவே, உடலுக்குக் கேடு தரும்  எனப் படிப்பதால் இது குறித்து அளவுகடந்து பேரச்சம் கொள்கின்றனர்.

00

 667. கரு விளக்கு வெருளி – Hleguphobia

கரு நிற ஒளி விளக்கு(black light) குறித்த வரம்பற்ற பேரச்சம் கரு விளக்கு வெருளி.

மிகச்சிறு அளவில் தெரியும் புற ஊதா ஒளி, மானிடப் பார்வை அளவுகளைத் தாண்டி இருப்பதால,  அது கண்ணுக்குத் தெரியாது. எனவே இந்தப் புறஊதா ஒளி உள்ள அறை கருப்பு ஒளி வெளிச்சம் உள்ளதாகத் தோன்றுகிறது.

00

668. கருஞ்சிவப்பு வெருளி-Porphyrophobia

கருஞ்சிவப்பு நிறம் மீதான இயல்புமீறிய பேரச்சம் கருஞ்சிவப்பு வெருளி எனப்படும்.

கருஞ்சிவப்பு நிறத்தைக் காலனாகக் கருதி அஞ்சுவார்கள் இத்தகையோர். கருஞ்சிவப்பு நிற மலர்களையோ கருஞ்சிவப்பு வண்ணப் பழங்களையோ(Berry) அவ்வண்ணத்திலான குதிரைகளையோ, உடைகளையோ கண்டு பேரச்சம் கொள்வர். பிறர் கருஞ்சிவப்பு நிற ஆடை அணிந்து வந்தாலும் பேரச்சம் கொள்வர். தோலில் கருஞ்சிவப்புநிறப் புள்ளி நோய் வரும் என்று அஞ்சுவர். கருஞ்சிவப்பு நிறக் கெம்புக்கல்(Ruby) விலை உயர்ந்ததாக இருந்தாலும் அதனை ஏற்க மாட்டார்கள்.

prophyro என்னும் கிரேக்கச் சொல்லிற்குக் கருஞ்சிவப்பு (purple)எனப் பொருள்.

00

(தொடரும்)

இலக்குவனார் திருவள்ளுவன்

வெருளி அறிவியல் 2/5

வெருளி நோய்கள் 659-663: இலக்குவனார் திருவள்ளுவன்

ஃஃஃ      இலக்குவனார் திருவள்ளுவன்      10 November 2025      அகரமுதல

(வெருளி நோய்கள் 654-658:  தொடர்ச்சி)

வெருளி நோய்கள் 659-663

659. கரப்பான் வெருளி – Katsaridaphobia

கரப்பான்பற்றிய பெருங்கவலையும் பேரச்சமும் கரப்பான் வெருளி.
கரப்பான் பூச்சி பறந்து மேலே விழும், உணவில் விழும், நோய் பரப்பும் என்பன போன்ற அருவருப்பும் கவலையும் அச்சமும் கரப்பான் பூச்சி வெருளிக்குக் காரணமாக அமைகின்றன.
கரப்பான் குருதி வெண்ணிறமாக இருக்கும். இதனை இரத்தமாக எண்ணாமல் அடிபட்டிருக்கும் கரப்பானைக் கண்டு அருவருப்பு அடைவர். கரப்பான் பூச்சி உடல் பலபகுதிகளாகப் பிரிக்கப்பட்டு ஒவ்வொரு பகுதியிலும் அதைக் கட்டுப்படுத்தும் நரம்பணுத்திரள்கள் உள்ளன.ஆதலால், இதன் தலையை வெட்டிவிட்டால் கூட இரண்டு வாரத்திற்கு உயிர்வாழும். எனவே, அடித்தாலும் சாகாது என எண்ணி இதனைக் கண்டு மேலும் அஞ்சுவர்.
00

660. கராஅம் வெருளி – Aligatoraphobia
     கராஅம் (முதலைகள்) மீதான அளவுகடந்த பேரச்சம் கராஅம் வெருளி. விலங்கு வெருளி வகையைச் சேர்ந்ததே இதுவும்.
     Crocodile, Alligator இரண்டையும் நாம் முதலை என்றே சொல்கிறோம். பொருள் அடிப்படையில் இரண்டும் சரிதான். பல்லி என்னும் பொருளுடைய கிரேக்கச் சொல்லில் இருந்து உருவானது குரோகடைல். பல்லி என்னும் பொருளுடைய இசுபானியச் சொல்லில் இருந்து உருவானது அலிகேட்டர். மூலப் பொருள் ஒன்றாயினும் வெவ்வேறு வகையைக் குறிப்பதால் நாமும் அவ்வாறே குறிப்பதே சிறப்பு. முதலை, இடங்கர், கராம் என முதலைகளின் வெவ்வேறு வகைகள் பழந்தமிழகத்தினர் அறிந்திருந்தனர். குறிஞ்சிப்பாட்டில் ஒரே வரியிலேயே(257)
     கொடுந் தாள் முதலையும், இடங்கரும், கராமும்
     என வருவதால் இவை முதலையின் வேறு பெயர்கள் என எண்ணாமல், வேறுவகைப் பெயர்கள் என்பதைப் புரிந்து கொள்ளலாம். முதலை(10), கராஅம்(4), கராம்(20), கரா(1), எனச் சங்க இலக்கியங்கள் குறிப்பிட்டுள்ளன போல், மகரம், ஆட்பிடியன், சாணாக முதலை முதலான வேறு வகைகள் இருந்தன எனப் பின்னுள்ள இலக்கியங்கள் வழி அறிகின்றோம். விலங்கு வகைகளை நன்குணர்ந்த அறிவியலுக்கு உரிய நாம் ஒரே பெயரில் அழைப்பதை விடப் பின்வருமாறு வேறுபடுத்திக் குறிப்பிடலாம்.
     இடங்கர்-crocodile
     கராஅம்-alligator
     முதலை-gavial (பாவாணர்: சொல்லாராய்ச்சிக் கட்டுரைகள்: பக்கம் 43).
     00
661. கரி வெருளி – Karvounophobia
     கட்டைக் கரி/விறகுக் கரி/மரக்கரி/கரி(charcoal)/ நிலக்கரி/ பழுப்புக்கரி மீதான அளவு கடந்த பேரச்சம் கரி வெருளி.
     கரித்தூசி உடலில் அல்லது உடையில் ஒட்டிக் கொண்டு படிந்து விடும் என்றும் கரித்தூள் மூச்சு உயிர்க்கையில் உடல் நலக்கேடு ஏற்படும் என்றும் கரிப்புகை கண்களுக்குத் தீங்கு விளைவிக்கும் என்றம் பலவாறாகக் கவலைப்பட்டுக் கரி மீதான பேரச்சத்தை வளர்த்துக் கொள்கின்றனர்.
     Karvouno என்னும் கிரேக்கச் சொல்லிற்கு நிலக் கரி எனப் பொருள்.
     00
662. கரிக்கோல் வெருளி – Molyviphobia / Pencillophobia

கரிக்கோல்(Pencil) தொடர்பான அளவுகடந்த பேரச்சம் கரிக்கோல் வெருளி.
Pencil என்பதை எழுதுகோல் என்றும் சொல்வர். ஆனால் அது பொதுச் சொல்லாக இருப்பதால் கரிக்கோல் எனக் குறிக்கப் பெற்றுள்ளது.

00

663. கரிசு வெருளி -Hamartophobia/ Peccatiphobia/ Peccatophobia

பாவச்செயல்கள் செய்வதற்கு அஞ்சுவது கரிசு வெருளி.

கரிசு என்றால் பாவம் என்று பொருள்.

பாவம் செய்தது அல்லது செய்வது தொடர்பான, அதன் விளைவுகள் தொடர்பான அளவுகடந்த பேரச்சம் கொள்ளுதல்.

தீவினை செய்வதற்கு அச்சம் இருப்பதுதான் நற்செயல்கள் செய்வதற்குத் தூண்டுதலாக அமையும். எனவே, இந்த அச்சம் தவறல்ல. ஆனால், எல்லாச் செயல்கைளயும் கரிசாகக் கருதி இயல்புக்கு மீறிய அச்சம் தவறாகும். இதனால் கரிசிற்குக் கழுவாய் செய்வதாக – பாவவிமோசனம் செய்வதாகச் சிலர் ஏமாற்றுவதற்கு ஆளாகின்றனர்.  

pecca என்னும் இலத்தீன் சொல்லிற்குக் கரிசு, குற்றம் செய்தல்/ கற்பனைக் குற்றம் எனப் பொருள்கள்.

hamarto என்னும் கிரேக்கச் சொல்லிற்கும் பாவம் எனப் பொருள்.  

00

(தொடரும்)

இலக்குவனார் திருவள்ளுவன்

வெருளி அறிவியல் 2/5

வெருளி நோய்கள் 654-658: இலக்குவனார் திருவள்ளுவன்

`ஃஃஃஃ       இலக்குவனார் திருவள்ளுவன்      09 November 2025      அகரமுதல

(வெருளி நோய்கள் 649-653: தொடர்ச்சி)

வெருளி நோய்கள் 654-658

654. கம்பளி யானை வெருளி – Mammothphobia

கம்பளி யானை  எனப்பெறும் மிகப்பெறும் யானைமீதான பேரச்சம் கம்பளி யானை வெருளி.

அடர்ந்த முடிகளால் உடல் மூடப்பட்டுள்ளதால் கம்பளி யானை  எனப்பெறுகிறது. 4.8 பேராயிரம்(மில்லியன்) ஆண்டுகளுக்கு முன்பு வாழ்ந்த இனம்.இப்பொழுது இல்லை. எனினும் இதனைப்பற்றிய செய்திகளை அறிய வரும் பொழுது படங்களைப்பார்க்கும்பொழுது பேரச்சத்திற்கு ஆளாகின்றனர்.

Mammoth என்கிற சொல் மன்சி என்ற உருசிய மொழியில் இருந்த MAMOHT mamont என்ற சொல்லிலிருந்து திரிந்து வந்ததாகும். ஆங்கிலச் சொல் “mammoth” என்பது “பெரிய” அல்லது “மிகப்பெரிய” என்கிற பொருள் தருவதாகும்.

00

 655. கம்பளி வெருளி –  Lodiculaphobia / Lanaphobia

கம்பளி குறித்த வரம்பற்ற பேரச்சம் கம்பளி வெருளி.

Lodicula என்றால் தூய்மைப்படுத்து என்றும் பொருள் உள்ளது. இருப்பினும் இங்கே கம்பளி விரிப்பைக் குறிக்கிறது.

00

656. கம்பி வெருளி – Filophobia

கம்பி – பொதுவாக மின் கம்பி – குறித்த வரம்பற்ற பேரச்சம் கம்பி வெருளி.

அலுவலகங்கள், வீடுகள், பொதுவிடங்களில் மின்கம்பிகள் இருப்பதைப் பார்க்கும் பொழுது மின் அதிர்ச்சி ஏற்படும் என்றோ தீப்பற்றலாம் என்றோ மின் கம்பியை மிதித்து மின்தாக்குதலுக்கு உள்ளாகலாம் என்றோ எண்ணி அளவுகடந்த பேரச்சம் கொ்ளகின்றனர். இப்பொழுது கட்டடங்களில் மின்கம்பிகள்மறைவு நிலையில் சுவருக்குள் இருக்கும் வகையில்தான் பயன்படுத்துகின்றனர். நாம் அறியா வண்ணம் மின் கசிவு ஏற்பட்டுத் தீ நேர்ச்சி ஏற்படுமோ என்ற தேவையற்ற பேரச்சம் கொள்வோர் உள்ளனர்.

00

 657. கயவன் வெருளி – Nefarophobia

கயவர்கள் பற்றிய வரம்பில்லாப் பேரச்சம் கயவன் வெருளி.

(Nefaro=villain)அயற்சொல்லைத் தமிழிலேயே வில்லன் என்று குறிக்கும் தவறான பழக்கம் உள்ளது.

இதன் பொருளைத் தீயவன், கேடன், கொடியோன், போக்கிலி, முரடன் என்பனபோன்று கருதுகிறோம். ஆனால், இச்சொல், நாட்டுப்புறத்தில் குடியிருப்பவர்(inhabitant of a villa) என்னும் பொருள் தரும் இலத்தீன் சொல்லில் இருந்துதான் உருவானது. பின் நாட்டுப்புறவாசி என்னும் பொருள் தந்தது. மத்தியக்காலம் வரை சிற்றூர் வாசி என்னும் பொருளே இருந்தது. பின்னர் வெளிப்படையான மனமும் பழக்க வழக்கங்களும் உடையவர் என்னும் பொருளுக்கு வந்தது. இதுவே நாளடைவில், பண்பு நயங்கெட்ட, நடைநயங் கெட்ட, அருவருப்பான ஆளினைக் குறிக்கத் தொடங்கிற்று. இக்காலததில் இழிஞரையும்(scoundrel) குற்றவாளிகளையும் குறிக்கலாகிறது.

பாதகஞ் செய்பவரைக் கண்டால் – நாம்

பயங்கொள்ள லாகாது பாப்பா,

மோதி மிதித்துவிடு பாப்பா – அவர்

முகத்தில் உமிழ்ந்துவிடு பாப்பா.

என்கிறார் பாரதியார். இவ்வாறு கயவரை எதிர்க்கும் துணிவுடன் இருந்தால் கயவன் வெருளி வராது.

00

658. கரடி வெருளி- Arkoudaphobia

கரடி மீதான அளவுகடந்த பேரச்சம் கரடி வெருளி.

‘bear’ என்னும் ஆங்கிலச் சொல்லிற்குப் பழுப்பு நிறமானது என்றுதான் பொருள். சுலாவிக்கு(Slavic) மொழியில் தேனுண்ணி என்பர். உருசியர்கள் தாத்தாவாகக் கருதுவர். இவ்வாறு குடும்ப உறுப்பினராகக் கருதினால் கரடியினால் ஏற்படும் தீங்கு குறையும் என்பது அவர்கள் நம்பிக்கை.

உளியம், எண்கு, எலு, குடாவடி, பல்லம், பல்லூகம், மிளிறு எனப் பல வகைகளில் கரடியைக் குறிக்கின்றனர். வளைந்த அடியையுடைதாகிய உயிரினம் என்னும் பொருளில் குடாவடி என்கின்றனர்.

arkouda  என்னும் கிரேக்கச் சொல்லின் பொருள் கரடி.

00

(தொடரும்)

இலக்குவனார் திருவள்ளுவன்

வெருளி அறிவியல் 2/5