(வெருளி நோய்கள் 1256 -1260 தொடர்ச்சி)

வெருளி நோய்கள் 1261 -1265

  1. தித்தியன் வெருளி – Candymanphobia
    புனைவுரு பாத்திரமான தித்தி மனிதன்(Candyman) குறித்த வரம்பற்ற பேரச்சம் தித்தியன் வெருளி.
    Candy என்பதற்குக் கற்கண்டு(கல்கண்டு), மிட்டாய் எனக் குறிக்கின்றனர். மிட்டாய் தமிழ்ச்சொல்லல்ல. கற்கண்டு என்பது சருக்கரையின் தூய்மை செய்யப்படாத வடிவம்; படிகம்போல இருக்கும் கரும்புச் சாற்றின் கட்டி. எனவே, பொதுவான இனிப்புப்பண்டத்தை அவ்வாறு குறிப்பது பாெருந்தாது. எனவே, தித்திக்கும் இயல்புடைய இதனைத் தித்தி எனலாம்.
    கதை உருவாகிய தித்தி மனிதனைத் தித்தியன் என்பது பொருத்தமாக இருக்கும்.
    00
  2. திமிங்கில வெருளி – Falainaphobia

திமிங்கிலம் தொடர்பான அளவுகடந்த பேரச்சம் திமிங்கில வெருளி.
திமி என்பது மிகப்பேருரு கொண்ட மீன். திமி எனப்படும் அந்த மீனையே உட் கொள்வதால் திமிங்கிலம் எனப் பெயர் வந்தது என்பர். திமிங்கலம் என்று சொல்வது தவறு.
75 வகைத் திமிங்கிலங்கள் உள்ளன. மிகப்பெரிய திமிங்கிலத்தின் பெயர் நீலத் திமிங்கிலம். இதன் நாக்கு 50 பேர் உட்காரும் அளவு பெரியது. கடற்பயணம் மேற்கொள்ளாவிட்டாலும் படங்களைப் பார்த்துத் திமிங்கிலங்களால் கண்டம்(ஆபத்து) வரும் எனக் காரணமற்ற பேரளவு அச்சம் கொள்வோர் உள்ளனர்.
Falaina என்னும் கிரேக்கச் சொல்லிற்குத் திமிங்கிலம் எனப் பொருள்.
00

  1. திமிலிலி ஒட்டக வெருளி- Llamaphobia

திமிலிலி ஒட்டகம் (llama) தொடர்பான அளவுகடந்த பேரச்சம் திமிலிலி ஒட்டக வெருளி
கலைச்சொல் அகராதியில் இதனைச் சடை எருமை எனக் குறிப்பிட்டிருந்தாலும் ஒட்டக வகையைச் சேர்ந்த இதனைத் திமிலிலி ஒட்டகம் என்பதே பொருத்தமாக இருக்கும்.
00

  1. திம் வெருளி – Timothyphobia

புனைவுரு பாத்திரமான திமோத்தி; ‘திம்’ தொடர்பான அளவுகடந்த பேரச்சம் திம் வெருளி.
திமோத்தியாசு-Timotheos என்னும் கிரேக்கச்சொல்லின் பொருள் கடவுளை மதித்தல் அல்லது கடவுளால் மதிக்கப்படுதல். இப்பெயரைச் சுருக்கமாகத் திம்-Tim என்பர்.
கி.பி. 97 அளவில் இறந்த தூய ஆயரின் பெயரே இதுவாகும். இப்பெயரை இக்கதைப்பாத்திரத்திற்குச் சூட்டியுள்ளனர்.
00

  1. திம்மிதிபில் வெருளி – Timmytibblephobia

புனைவுரு பாத்திரமான திம்மிதிபில் தொடர்பான அளவுகடந்த பேரச்சம் திம்மிதிபில் வெருளி.
திம்மி திபிள், தாமி திபிள், (Timmy and Tommy Tibble) ஆகியோர் ‘ஆர்தர்’ என்ற சிறுவர் தொலைக்காட்சித் தொடரில் வரும் கதைப்பாத்திரங்கள். அவர்கள் டி.டபிள்யூ-வின் மழலையர் வகுப்பு மாணவர்கள், சுறுசுறுப்பான இரட்டையர்கள். தொலைக்காட்சித் தொடரில் கரடிகளாகவும் புத்தகத்தில் மனிதர்களாகவும் காட்சியளிப்பார்கள்.
00

(தொடரும்)
இலக்குவனார் திருவள்ளுவன்
வெருளி அறிவியல் 3/5