(வெருளி நோய்கள் 1361-1365: தொடர்ச்சி)

வெருளி நோய்கள் 1366 -1370

  1. தேனீ வெருளி-Apiphobia/ Melissaphobia/ Melissophobia / Beephobia (1)

தேனீக்கள் குறித்த தேவையற்ற பேரச்சம் தேனீ வெருளி.
தேன்(69), ஈ(6), வண்டு (189)ஆகிய சொற்கள் சங்கப்பாடல்களில் இடம் பெற்றிருந்தாலும், தேனீ இடம் பெறவில்லை.
api சொல்லின் மூலமான apis என்னும் கிரேக்கச் சொல்லின் பொருள் தேனீ.
melissa என்னும் கிரேக்கச் சொல்லின் பொருள் தேன்(ஈ).
காண்க: ஆ நிலை வெருளி – Beephobia (2)

00

  1. தைப்பி வெருளி – Staplophobia

தாள்தைப்பி குறித்த தேவையற்ற அளவுகடந்த பேரச்சம் தைப்பி வெருளி.
தாள்களை இணைக்கும் பொழுது தவறுதலாகக் கையில் கம்பி குத்திவிடும் அல்லது தைத்து விடும் என்று தேவையற்ற அளவுகடந்த பேரச்சம் கொள்வது.
Stapler என்னும் செருமானியச் சொல்லின் பொருள் அடுக்கு(stack) என்பதாகும். தாள்களை அடுக்கி வைத்துப் பிணைப்பதால் தைப்பிக்கு இப்பெயர் வந்தது.
நூலால் இணைத்தல் மட்டும் தைத்தல் அல்ல. ஆணி முதலியன அடித்தல், இலை முதலியன குத்தியிணைத்தல், பொருத்துதல், முள் முதலியன ஊடுருவுதல், கோத்தல், ஒப்பனை செய்தல், உருவாக்குதல் முதலான பல பொருள்கள் உள்ளன. கம்பியால் தாள்களை இணைப்பதால் தைப்பி எனப்படுகிறது. சிலர் பிணைப்பி என்றும் கூறுகின்றனர்.
கூர் வெருளி(Aichmophobia) உள்ளவர்களுக்குத் தைப்பி வெருளி வரும் வாய்ப்பு உள்ளது.
00

  1. தைலசு வெருளி – Tailsphobia

புனைவுரு தைலசு(Tails) தொடர்பான அளவுகடந்த பேரச்சம் தைலசு வெருளி.
தைலசு (Tails) முள்ளம்பன்றி ஒலிப்பன்(Sonic the Hedgehog) 2 என்னும் காணாட்டத்தில் இடம் பெறும் பாத்திரத்தின் பெயர் Tails என்பதாகும். இதன்பொருள் வால்கள்தான். ஆனால் நரிக்கு இரண்டு வால்கள் உள்ளமையால் பன்மையால் ஆகுபெயராக வால்கள் எனக் குறிக்கப்பெற்றது. இவ்வாறு குறிப்பின் தவறான பொருள் வரும் என்பதால் பெயர்ச் சொல்லாகத் தைலசு எனப்பட்டது. இதன் முழுப்பெயர் மைல்சு பிரோவெர் (Miles Prower). யசுசி யமாகுச்சி(Yasushi Yamaguchi) என்பவரால் 1992 இல் உருவாக்கப்பெற்ற காணாட்டத்தில் ஒலிப்பனின் உற்ற தோழனாக உருவாக்கப்பட்ட பாத்திரம்.
00

  1. தொகு வெருளி-Editophobia

தொகுப்புப்பணி குறித்த அளவுக்கு மிகுதியான தேவையற்ற பேரச்சம் தொகு வெருளி.
இதழாக இருந்தாலும் மலராக இருந்தாலும் திரைப்படம் அல்லது தொலைக்காட்சிப்படம் அல்லது ஆவணப்படமாக இருந்தாலும் தொகுப்பு முறையாக அமைந்திருக்குமா? முதன்மையானது எதுவும் விடுபட்டிருக்குமோ? தொடர்பில்லாதது சேர்க்கப்பட்டிருக்குமோ? என்றெல்லாம் கவலைப்பட்டுப்பேரச்சத்திற்கு ஆளாகின்றனர்.
00

  1. தொடக்கப்பள்ளி வெருளி – Dimotikophobia

தொடக்கப்பள்ளி தொடர்பான அளவுகடந்த பேரச்சம் தொடக்கப்பள்ளி வெருளி.
குழந்தைகள் வீட்டை விட்டு வெளியே சென்று புதியவர்களைச் சந்திக்கும் இடமாகத் தொகக்கப்பள்ளி உள்ளது. இதனால் அவர்களுக்குப் பெரிதும் அச்சம் வருகிறது. மழலையர் பள்ளிகள், இளமழலையர் பள்ளிகள் இப்போது இருப்பினும் பள்ளிக்கூடக் கட்டமைப்பில் இல்லை. சிலருக்கு மழலைநிலைப்பள்ளிகளே தொடக்கப்பள்ளி என்ற முறையில் அங்கு செல்லவும் காரணமற்றபேரச்சம் உள்ளது.
Dimotiko என்னும்கிரேக்கச்சொல்லிற்குத் தொடக்கப்பள்ளி என்று பொருள்.
00

(தொடரும்)
இலக்குவனார் திருவள்ளுவன்
வெருளி அறிவியல் 3/5