(வெருளி நோய்கள் 1376 -1380: தொடர்ச்சி)

வெருளி நோய்கள் 1381 -1385

  1. தொலைக்காட்சி வெருளி – Proscriptiophobia / Shijiphobia / Televisiophobia

வணிக முறையிலான தொலைக்காட்சி மீதான அளவுகடந்த பேரச்சம் தொலைக்காட்சி வெருளி.
வணிக ஆதாயத்திற்காகப் பொய்யான செய்திகளைப் பரப்பி நம்ப வைப்பார்கள் என்பதுபோன்ற உணர்வுகளால் தொலைக்காட்சி மீது அளவுகடந்த வெறுப்பும் அச்சமும் கொள்வர்.
காண்க: தொலைக்காட்சி நிகழ்ச்சி வெருளி(TVshowphobia)
00

  1. தொலைபேசி மணி வெருளி -Telephonophobia

தொலைபேசி மணி தொடர்பான அளவுகடந்த பேரச்சம் தொலைபேசி மணி வெருளி.
தொலைபேசி மணியைப் பேரிடர்(அபாய) மணியாக எண்ணிப் பேரச்சம் கொள்வோரும் உள்ளனர்.

தொலைப்பேசி மணி என்றும் குறிப்பர்.
காண்க: Telephonobia
00

  1. தொலைபேசி வெருளி -Telephonobia

தொலைபேசியில் ஒருவரை அழைப்பதற்கு அல்லது தொலைபேசியில் பிறரிடம் இருந்து அழைப்பு வருவது குறித்து வரம்பு கடந்த பேரச்சம் கொள்வது தொலைபேசி வெருளி -Telephonobia.
சிலர் தொலைபேசி மணி அடித்ததுமே அலறி அடித்துக் கொண்டு எடுப்பர். சிலர் தவறான அல்லது துன்பமான அல்லது தோல்விபற்றிய அல்லது இழப்பு பற்றிய செய்தி வருமோ எனக் காரணமின்றி அஞ்சுவர்.
நிலை பேசி அல்லது நிலப்பேசி இல்லாமல் அலைபேசி குறித்த பேரச்சம் அலை பேசி வெருளி(Nomophobia) எனக் குறிக்கப் பட்டுள்ளதுபோல்தான் இதுவும்.
பேச்சு தொடரல்பான பேரச்சம் உள்ளவர்களுக்கும் தொலைபேசி வெருளி வரும் வாய்ப்பு உள்ளது.

தொலைப்பேசி வெருளி என்றும் குறிப்பர்.


00

  1. தொலைப்பு வெருளி – Respraeterphobia

பொருள்களைத் தவறவிடுவது தொடர்பான அளவுகடந்த பேரச்சம் தொலைப்பு வெருளி.
பணம், நகை, சான்றிதழ்கள், முதன்மையான கோப்புகள் போன்றவற்றைப் பயணத்தில் அல்லது இடப் பெயர்வு நேரத்தில் அல்லது வீட்டிற்குள்ளேயே அல்லது அலுவலகத்திற்குள்ளேயே தொலைத்து விடுவோம் என்ற அளவுகடந்த பேரச்சம் கொள்வர்.
00

  1. தொலைவு வெருளி – Apostasiphobia

தொலைவு குறித்த வரம்பற்ற பேரச்சம் தொலைவு வெருளி.
Apostasi என்னும் கிரேக்கச் சொல்லிற்குத் தொலைவு எனப் பொருள்.
தொலைவிடப் பயணங்கள், பிள்ளைகள் அல்லது குடும்பத்தினர் தொலைவில் இருத்தல் போன்ற காரணங்களால் தொலைவு குறித்த பேரச்சம் வருகிறது.
சாலைவெருளி(Hodophobia) உள்ளவர்களுக்குத் தொலைவு வெருளி வரும் வாய்ப்பு உள்ளது.
00


(தொடரும்)
இலக்குவனார் திருவள்ளுவன்
வெருளி அறிவியல் 3/5